उरण-मुंबई सागरी मार्गावरील ई-स्पीड बोट सेवेला मुहूर्त कधी? १५ ऑगस्ट का १ सप्टेंबर

उरण-मुंबई जलद प्रवासाचे वेध
ई-स्पीड बोटसेवेला अखेर मुहूर्त
उरण, ता. १० (वार्ताहर)ः जेएनपीए-मुंबई सागरी मार्गावरील अत्याधुनिक ई-स्पीड बोटसेवा १५ ऑगस्ट किंवा १ सप्टेंबरच्या मुहूर्तावर सुरू होणार असल्याचे माझगाव डॉक बिल्डर्स लिमिटेड कंपनीने सांगितले, त्यामुळे प्रवाशांची प्रतीक्षा संपण्याची आशा आहे.
उरण रेल्वेमार्गावर पावणेदोन वर्षांपासून प्रवासी वाहतुकीला सुरुवात झाल्याने जेएनपीए-मुंबई सागरी मार्गावरील ताण वाढला आहे. यामुळे जेएनपीए-मुंबई या सागरी प्रवासी मार्गावरील बोटसेवेचा खर्च परवडत नाही. या प्रवासी वाहतुकीसाठी वापरण्यात येणाऱ्या जुनाट लाकडी बोटी खर्चिक, सुरक्षिततेच्या दृष्टिकोनातूनही उपयुक्त नसल्याने स्पष्ट झाले आहे. यामुळे जेएनपीएचे अध्यक्ष उन्मेष वाघ यांनी प्रदूषणविरहित इलेक्ट्रिक अत्याधुनिक तंत्रज्ञान व सोयीसुविधांनी सुसज्ज असलेल्या ई-स्पीड बोटींचा पर्याय निवडला.
--------------------------------------------
ई-स्पीड बोटीची वैशिष्ट्ये
- अत्याधुनिक तंत्रज्ञानाचा वापर
- ३७ कोटी ८९ लाख ९४ हजार १९० खर्चाची तरतूद
- उन्हाळ्यात- २० ते २५ प्रवासी क्षमता
- पावसाळ्यात- १० ते १२ प्रवासी क्षमता
------------------------------------------
अडचणींचा फेरा
- अत्याधुनिक तंत्रज्ञानाचा वापर करून बनविलेल्या दोन स्पीड बोटी फेब्रुवारीपासूनच प्रवासी वाहतुकीसाठी दाखल होणार होत्या; मात्र स्पीड बोटींचा वेग, प्रवासी वाहतुकीची क्षमता, तांत्रिक अडचणींमुळे सहा महिन्यांपासून ही सेवा सुरू करण्यात विलंब होत आहे.
- चार्जिंग प्रणाली अद्ययावत करण्याचे काम एका कंपनीकडे सोपविले होते. त्यानंतर ई-स्पीड बोटीच्या चाचण्या घेण्यात येणार असल्याची माहिती माझगाव डॉक बिल्डर्स लिमिटेड कंपनीकडून स्पष्ट करण्यात आले आहे.