प्रिया खान यांची वाशी हवेली कोळीवाड्याच्या स्वप्नवत गावाला भेट

वाशी हवेली कोळीवाडा गावाला प्रिया खान यांची भेट
गाव दत्तक घेऊन रोजगार, पर्यटन आणि पायाभूत सुविधा उभारणीचे आश्वासन
तळा, ता. १० (बातमीदार) ः मुख्यमंत्री देवेंद्र फडणवीस यांच्या विशेष कार्य अधिकारी (ओएसडी) प्रिया खान यांनी वाशी हवेली कोळीवाडा या निसर्गरम्य गावाला भेट देऊन गावकऱ्यांशी विकास, रोजगारनिर्मिती आणि पर्यटन वाढवण्याच्या दृष्टीने चर्चा केली. या भेटीत त्यांनी गाव दत्तक घेऊन त्याला समृद्धीच्या मार्गावर नेण्याच्या योजनेवर प्रकाश टाकला.
गावाचा हिरवा परिसर, सांस्कृतिक वारसा आणि शांत वातावरणाचा लाभ घेऊन पर्यटनाला चालना देण्याचा विचार त्यांनी मांडला. पर्यटकांकडून नाममात्र कर आकारण्याचा प्रस्ताव मांडत, या करातून पर्यटनस्थळांचे जतन, स्थानिक कलाकारांना प्रोत्साहन आणि गावकऱ्यांना उत्पन्नाची संधी निर्माण करण्याचा उद्देश त्यांनी स्पष्ट केला. गावातील तरुणांसाठी लघु उद्योग, शेती, हस्तकला आणि पर्यटन यामध्ये रोजगाराच्या संधी वाढवण्यावर विशेष भर देण्यात येणार आहे. महिलांना स्वयंरोजगारासाठी कौशल्य विकास कार्यक्रम राबवण्याचे नियोजन असून, शेतकऱ्यांना आधुनिक शेती तंत्रज्ञान व बाजारपेठ उपलब्ध करून देण्याची योजना आहे. पायाभूत सुविधांमध्ये रस्ते, पाणीपुरवठा, शिक्षण, आरोग्य सुविधा आणि डिजिटल कनेक्टिव्हिटी सुधारण्याचे आश्वासनही देण्यात आले. तसेच स्थानिक कलाकार व हस्तकलेसाठी राष्ट्रीय आणि आंतरराष्ट्रीय बाजारपेठेत पोहोच मिळवून देणारे विशेष विपणन व्यासपीठ तयार करण्याचा प्रस्ताव ठेवण्यात आला.
पर्यटकांसाठी गावात स्थानिक खाद्यपदार्थ, हस्तकला विक्री आणि सांस्कृतिक कार्यक्रमांचे आयोजन करण्याचा विचारही या वेळी चर्चेत आला. प्रिया खान यांनी गावकऱ्यांचे मत जाणून घेत सर्वांच्या सहभागातून या योजनांना अंतिम स्वरूप देण्याचे आवाहन केले. त्यांच्या भेटीमुळे गावकऱ्यांच्या मनात विकासाचे नवे स्वप्न आणि आशा निर्माण झाल्या आहेत.