तिरंग्याविषयी अभिमान, देशभक्तीची प्रेरणा आणि राष्ट्रीय एकतेचा संदेश ही सायकल रॅली नागरिकांपर्यंत पोहोचवेल! -

हर घर तिरंगा अभियानांतर्गत सायकल रॅली
कल्याण, ता. १० (वार्ताहर) ः हर घर तिरंगा अभियानांतर्गत रविवारी (ता. १०) महापालिकेच्या विद्युत विभागामार्फत आयोजित सायकल रॅलीस उस्फूर्त प्रतिसाद मिळाला. कल्याण सायकलिस्ट ग्रुप, डोंबिवली सायकलिस्ट ग्रुप, हिरकणी महिला सायकलिस्ट ग्रुप, पलावा सायकलिस्ट ग्रुप, बाइकपोस्ट सायकलिस्ट ग्रुप, एव्हरग्रीन सायकलप्रेमी ग्रुप, डोंबिवली या संस्थांच्या सुमारे २०० सदस्यांनी आणि सायकलप्रेमींनी या रॅलीत सहभाग घेतला होता.
या सायकल रॅलीचे उद्‍घाटन पालिका आयुक्त अभिनव गोयल यांनी केले. अतिरिक्त आयुक्त हर्षल गायकवाड आणि विद्युत विभागाचे कार्यकारी अभियंता प्रशांत भागवत यांनी आयुक्त निवासापासून महापालिका मुख्यालयापर्यंत स्वतः सायकल चालवीत रॅलीत सहभाग घेतला.
या वेळी उपायुक्त संजय जाधव, समीर भूमकर, घनश्याम नवांगुळ, योगेंद्र राठोड, महापालिकेचे ब्रँड ॲम्बेसेडर डॉ. प्रशांत पाटील, आंतरराष्ट्रीय मॅरेथॉन धावपटू दिलीप घाडगे, सहाय्यक आयुक्त धनंजय थोरात, उमेश यमगर आणि इतर अधिकारी, कर्मचारी उपस्थित होते.