कांदिवलीतील कचरा वर्गीकरण केंद्राचा स्‍थानिकांना ताप

कांदिवलीतील कचरा वर्गीकरण केंद्राचा स्‍थानिकांना ताप
घाण, दुर्गंधीतून आरोग्‍य केंद्रात जाण्याची वेळ
कांदिवली, ता. १० (बातमीदार) ः कांदिवली पश्चिमेला इस्लाम कंपाउंड, के. डी. कंपाउंड आणि गांधीनगर विभागात सुरू केलेल्या कचरा वर्गीकरण केंद्राची केविलवानी, दयनीय अवस्था झाली आहे. बाजूलाच आरोग्य केंद्र आहे. पसरलेले घाणीचे साम्राज्य, दुर्गंधी यामुळे स्थानिकांचे आरोग्य धोक्यात आले आहे.
रुग्णांना आरोग्य केंद्रात जाण्यासाठीदेखील कचरा, दुर्गंधीचा सामना करावा लागतो. याकडे पालिकेने तातडीने लक्ष द्यावे, यासाठी शिवसेनेचे शाखाप्रमुख विजय मालुसरे यांनी विभागप्रमुख संतोष राणे, विधानसभा प्रमुख राजू खान उपविभागप्रमुख अनंत नागम यांच्यासह पाहणी केली. के. डी. कंपाउंड येथे महापालिकेच्या आर दक्षिण विभागाने स्वच्छ भारत अभियानांतर्गत ओला आणि सुका कचरा वर्गीकरण केंद्र सुरू केले आहे. मोठा फलकदेखील पालिकेने येथे लावला आहे, परंतु त्या ठिकाणी कचऱ्याचे साम्राज्य पसरले आहे. केंद्राची दुरवस्था झाली असून, प्रचंड दुर्गंधी पसरत आहे.
इस्लाम कंपाउंड, के. डी. कंपाउंड आणि गांधीनगर परिसरातील नागरिकांना दैनंदिन व्यवहारासाठी येथूनच मार्ग आहे. मार्गाच्या बाजूलाच असलेला कचरा आणि पसरलेली दुर्गंधीचा स्थानिक नागरिकांच्या आरोग्यावर परिणाम होत आहे. विशेष म्हणजे, बाजूलाच मुंबई महापालिका सार्वजनिक आरोग्य विभाग चारकोप १ अ आरोग्य केंद्रदेखील आहे. त्याच्याच बाजूला कनिष्ठ अधिकाऱ्यांसाठी एक कॅबिन बनवली आहे.
शाखाप्रमुख विजय मालुसरे यांनी घनकचरा विभागाच्या अधिकाऱ्यांना तसेच दत्तक वस्ती योजनेच्या ठेकेदाराला परिस्थिती निदर्शनास आणून दिली.
लवकरच सहाय्यक आयुक्तांशी बैठक घेऊन यावर तोडगा काढण्यासाठी सर्वोतोपरी प्रयत्न केले जातील, असे नागरिकांना आश्वासन दिले.

अधिक कर्मचारी लावून पूर्ण परिसर स्‍वच्छ करून घेऊ. येत्‍या काही दिवसांत हा परिसर कचरामुक्त होईल. मी स्वतः वैयक्‍तिक लक्ष देऊन काम करून घेईन.
- विजय मानकर, निरीक्षक, घनकचरा

के. डी. कंपाउंडच्या मुख्य मार्गाच्या बाजूलाच दवाखाना, कचरा वर्गीकरण केंद्र आणि अधिकारी यांची केबिन आहे, मात्र प्रचंड प्रमाणात कचरा, घाण आणि दुर्गंधी पसरल्याने कर्मचाऱ्यांसह नागरिकांचे आरोग्य धोक्यात आले आहे.
- रवी राऊळ, सामाजिक कार्यकर्ते