स्वच्छ अभियानात बस स्‍थानके नापास

स्वच्छ अभियानात बसस्‍थानके नापास
प्रवाशांची संख्या वाढली तरी सुविधांचा अभाव कायम
अलिबाग, ता. १० वार्ताहर ः एसटी महामंडळाच्या बाळासाहेब ठाकरे स्वच्छ, सुंदर बसस्थानक अभियानाच्या पहिल्या सर्वेक्षणात रायगड जिल्ह्यातील सर्वच बसस्थानके नापास झाली आहेत. बसस्थानक आणि प्रसाधनगृह, व्यवस्थापन आणि हरित बसस्थानक अशा निकषांच्या आधारे गुण देण्यात आले होते. रायगड जिल्ह्यात आठ प्रमुख आगार असून, या सर्वेक्षणात सर्वच बसस्थानके नापास झाल्याने महामंडळाचा ढिसाळ कारभार चव्‍हाट्यावर आला आहे.
एसटीच्या माध्यमातून जिल्ह्यात दिवसाला हजारो प्रवासी प्रवास करतात. महिला सन्मान योजना, ज्येष्ठ नागरिक सवलतीसह राज्य सरकारच्या प्रवास सवलतीमुळे प्रवासीसंख्या दिवसेंदिवस वाढत आहे, परंतु एसटीचे आगार, बसस्थानके मात्र असुविधांनी भरलेली आहेत. त्यामुळे प्रवाशांची प्रचंड गैरसोय होते. अनेक ठिकाणी कचऱ्याचे ढीग साचलेले पाहायला मिळतात. स्वच्छतागृहांची दुरवस्था, अस्वच्छता, पाण्याचा योग्य निचरा होत नसल्याने साचलेले पाणी, बसस्थानकांमध्ये भिकाऱ्यांची वाढती संख्या, त्यांच्यामुळे होणारी अस्वच्छता यामुळे प्रवाशांची खासकरून महिला प्रवाशांची मोठ्या प्रमाणात परवड होत आहे. प्रवाशांची गैरसोय दूर करण्यासाठी महामंडळाने हा उपक्रम राबविला आहे. २३ जानेवारीपासून सुरू झालेल्या स्वच्छता अभियानात बसस्थानक आणि प्रसाधनगृह, बसस्थानकाचे व्यवस्थापन आणि हरित बसस्थानक अशा निकषांच्या आधारे गुण देण्यात आले आहेत, मात्र या सर्वेक्षणात सर्वच बसस्थानके नापास झाली आहेत.
............
चैकट :
विभागातील ही बसस्थानके झाली नापास :
रायगड विभागात आठ प्रमुख बसस्थानके आहेत. अलिबाग, पेण, रोहा, कर्जत, माणगाव, श्रीवर्धन, महाड, मुरूड ही आठ प्रमुख बसस्थानके आहेत. यातील एकाही बसस्थानकाला सर्वेक्षणात गुण मिळाले नाहीत.
............
प्रतिक्रिया :
एसटी महामंडळाने बाळासाहेब ठाकरे स्वच्छ, सुंदर बसस्थानक अभियान राबविले होते. सर्वेक्षणात जिल्ह्यातील एकही बसस्थानक नंबर घेऊ शकले नाही. बसस्थानके स्वच्छ आणि सुंदर करण्याचा प्रयत्न राहणार आहे.
- दीपक घोडे, जिल्हा वाहतूक नियंत्रक