नवी मुंबईतील स्वच्छतागृहांची दुरवस्था

नवी मुंबईतील स्वच्छतागृहांची दुरवस्था
नागरिक त्रस्त
तुर्भे, ता. १० (वार्ताहर) : स्वच्छ सर्वेक्षणात देशात तिसरा क्रमांक पटकावणाऱ्या नवी मुंबई महापालिकेच्या स्वच्छतागृहांची अवस्था दिवसेंदिवस बिकट होत आहे.
बेलापूर सेक्टर-१ येथील नव्याने बांधलेले मोठे स्वच्छतागृह सध्या पाण्याविना, वीजपुरवठा खंडित आणि तुटलेल्या बेसिनांसह उभे आहे. पाइप व नळ चोरीला गेल्याने तीव्र दुर्गंधी पसरली असून, परिसरात घाणीचे साम्राज्य आहे. नवीन सुविधा सुरू करताना पालिकेने जुने स्वच्छतागृह बंद केले, मात्र तेथीलदेखील दुरवस्था झाली असून, या इमारती समाजकंटकांचे आश्रयस्थान बनली आहेत. परिसरात दारूच्या बाटल्यांचा खच आणि अस्वच्छतेचे वातावरण आहे. पालिकेकडे देखभालीचे कंत्राट असले तरी पर्यवेक्षक व अधिकारी असूनही देखरेखीत निष्काळजी दिसते. ऑनलाइन तक्रारी आणि हेल्पलाइनवर कळवूनही कारवाई होत नसल्याचा नागरिकांचा आरोप आहे. शहरातील अनेक सार्वजनिक शौचालयांत नळ, लाइट, पाणीपुरवठा यांचा अभाव असून, ‘ई-टॉयलेट’सह नवीन सुविधांचीही दुरवस्था झाली आहे. अनेक ठिकाणी दारूच्या बाटल्या, कचरा आणि घाणीचे ढीग दिसतात. व्यापारी व स्थानिकांच्या मते, सर्व स्वच्छतागृहांमध्ये सीसीटीव्ही बसवून चोरीला रोखला पाहिजे.
..................
स्वच्छ भारत अभियानअंतर्गत स्वच्छतेबाबत मोठमोठे दावे करणाऱ्या पालिकेच्या कार्यपद्धतीवर सजग नागरिक मंचाचे ॲड. डॉ. विशाल माने यांनी टीका केली आहे. स्मार्ट शौचालये उभारण्यापेक्षा विद्यमान स्वच्छतागृहांची देखभाल व व्यवस्थापन सक्षमपणे व्हावे अन्यथा नवीन प्रकल्पही बंद दरवाजे व घाणीत पडलेल्या शौचालयांप्रमाणे होण्याची शक्‍याता आहे. प्रशासनाने प्रत्यक्ष रस्‍त्‍यावर उतरून नागरिकांच्या कराच्या पैशांचा योग्य वापर करावा, असेही ते म्हणाले. नवी मुंबईकरांच्या मूलभूत गरजांपैकी एक असलेल्या स्वच्छतागृहांच्या समस्येकडे तातडीने लक्ष देणे आवश्यक असल्याची एकमुखी मागणी नागरिकांकडून होत आहे.