भिवंडीत ५३ लाखांचा गुटखा जप्त

भिवंडी, ता. १० (वार्ताहर) : शहरात मोठ्या प्रमाणावर प्रतिबंधित गुटखा विक्रीसाठी येणार असल्याची माहिती भिवंडी गुन्हे शाखेला मिळाली होती. त्यानुसार पोलिसांनी नारपोली परिसरात सापळा रचला असता, शहरात विक्रीसाठी ट्रकमधून आणलेला ५३ लाखांचा गुटखा गुन्हे शाखेच्या पोलिसांनी जप्त केला आहे. याप्रकरणी ट्रकचालकाला अटक करण्यात आली आहे.

राज्यात गुटखाविक्रीस मनाई असताना भिवंडी शहरात मोठ्या प्रमाणावर गुटखा सर्रासपणे विक्री होत आहे. मोहम्मद गणी पटेल (वय ४४, रा. तडोला गाव, जिल्हा बिदर, कर्नाटक) या ट्रकचालकाने ५३ लाख ३० हजार रुपयांचा प्रतिबंधित गुटखा, पानमसाला व सुगंधित सुपारी शहरात विक्रीसाठी आणली होती. याप्रकरणी पोलिसांना माहिती मिळाल्याने शुक्रवारी (ता. ८) सापळा रचत चालकाला अटक केली. याप्रकरणी गुन्हे शाखेचे पोलिस हवालदार साबीर शेख यांच्या फिर्यादीवरून नारपोली ठाण्यात ट्रकचालकाविरोधात गुन्हा दाखल केला आहे. हा गुटखा नेमका कोणी व कुठे विक्रीसाठी आणला होता, याचा तपास भिवंडी गुन्हे शाखा करीत आहे.