मुदत संपलेल्या सामाजिक संघटनेना पुन्हा संधी देणार

सामाजिक संघटना, ग्रंथालयांना अभय
कार्यालयांचे मुदत संपलेले करार पुन्हा करण्याची संधी
सकाळ वृत्तसेवा
नवी मुंबई, ता. १० ः सामाजिक संघटना आणि ग्रंथालयांना कार्यालये रिकामी करण्याबाबत नवी मुंबई महापालिकेने नोटिसा बजावल्या होत्या. या निर्णयाविरोधात संताप व्यक्त होत असताना अशा संघटनांनी पुन्हा करारासाठी संपर्क करावा, असा पवित्रा पालिका आयुक्त डॉ. कैलास शिंदे यांनी घेतला आहे. त्यामुळे पुन्हा करार करण्याची संधी मिळणार आहे.
नवी मुंबई पालिकेच्या स्थापनेच्या आधीपासून आत्तापर्यंत कार्यरत असणाऱ्या सामाजिक व स्वयंसेवी संस्थांना मालमत्ता सोडण्याच्या नोटिसा दिल्या गेल्या आहेत. सिडकोने हस्तांतर केलेल्या अशा २५० पेक्षा जास्त मालमत्ता आहेत. या मालमत्ता आता नव्या स्वरुपात भाडेपट्ट्यावर देण्याकरिता पालिका निविदा प्रक्रिया राबवणार आहे. या प्रक्रियेत वाशीतील टाऊन लायब्ररी, नूतन महिला मंडळ, स्त्री मूक्ती संघटना, न्यू बॉम्बे म्युझिक ॲँड ड्रामा सर्कल, नवी मुंबई स्वयंसेवी समन्वय संस्था, नवी मुंबई स्पोर्ट्स क्लब, अलर्ड इंडिया या सस्थांना नोटीस बजावण्यात आली होती. तसेच दोन दिवसांत जागा रिकामी करण्याचे निर्देश दिल्याने गोंधळ उडाला होता, पण अशा संघटनांनी पालिकेकडे संपर्क केलातर नियमांची पडताळणी करून पुन्हा करार करण्याचे संकेत आयुक्तांनी दिले आहेत.
------------------------------------
निविदा प्रक्रियेत सहभागी होणे सामाजिक संघटनांना शक्य नाही. आम्हाला कायमस्वरूपी जागा उपलब्ध करावी. आमच्याकडून माफक भाडे आकारावे. निविदा न काढता संस्थांच्या कामांची माहिती घेऊन जागा दिल्यास समाजकार्य करणे शक्य आहे. अनेकवेळा करार करण्यासाठी पालिका अधिकाऱ्यांना संपर्क केला होता.
- वृषाली मगदूम, स्त्री मुक्ती संघटना, विश्वस्त, नवी मुंबई
---------------------------------------
महापालिकेची जागा भाडेपट्ट्यावर देताना नियम तपासावे लागतात, मात्र या जागा आधीपासून स्वयंसेवी संस्थांना करारावर दिल्या आहेत. आता त्यांचे करार संपल्यानंतर संपर्क करणे अनिवार्य होते. करार संपल्यानंतर या जागा भाड्याने देण्यासाठी निविदा प्रक्रिया राबविली गेली असेल, मात्र संस्थांनी संपर्क केला, तर पालिका करार करण्याची पुन्हा संधी देईल.
-डॉ. कैलास शिंदे, आयुक्त, नवी मुंबई पालिका