बीडीडीवासीयांना गुरुवारी मिळणार हक्काच्या घराची चावी

बीडीडीवासीयांना गुरुवारी मिळणार हक्काच्या घराची चावी
पहिल्या टप्प्यात ५५६ जण जाणार सुसज्ज घरात
सकाळ वृत्तसेवा
मुंबई, ता. १० : वर्षानुवर्षे १६० चौरस फुटाच्या घरात दिवस काढणाऱ्या वरळी बीडीडीवासीयांची हक्काच्या प्रशस्त घरात जाण्याची प्रतीक्षा संपली आहे. पहिल्या टप्प्यात ५५६ रहिवाशांना गुरुवार, १४ ऑगस्ट रोजी नव्या घराचा ताबा मिळणार आहे. सकाळी ११ वाजता माटुंग्यातील यशवंत नाट्यमंदिरात मुख्यमंत्र्यांच्या उपस्थितीत चावी वाटपाचा कार्यक्रम होणार असल्याची माहिती सूत्रांनी दिली. त्यामुळे त्यांना यंदाचा गणेशोत्सव नव्या घरात साजरा करता येणार आहे.
म्हाडाच्या मुंबई मंडळाकडून वरळी, नायगाव आणि ना. म. जोशी मार्ग येथील बीडीडी चाळींचा पुनर्विकास केला जात आहे. में. टीसीसी कन्स्ट्रक्शन कंपनीमार्फत दोन टप्प्यांत वरळीतील १२१ चाळींचा पुनर्विकास करून ९६८९ घरे उभारण्यात येणार आहेत. त्यासाठी ४० मजली ३४ पुनर्वसन इमारती बांधण्यात येणार आहेत. पहिल्या टप्प्यातील पुनर्वसन इमारत क्र. १ मधील एकूण आठ विंगपैकी डी आणि ई या दोन इमारतींना ओसी मिळाली असून नव्या घराचा ताबा कधी मिळणार, याकडे रहिवाशांचे डोळे होते. अखेर त्यांची प्रतीक्षा संपली असून, गुरुवारी नव्या घराच्या चाव्या मिळणार आहेत. त्यामुळे रहिवाशांमध्ये आनंदाचे वातावरण आहे.