अन् एकनाथ शिंदे धावले....

...अन् एकनाथ शिंदे धावले
ठाणे पालिका वर्षा मॅरेथॉनमध्ये घेतला उत्स्फूर्त सहभाग
सकाळ वृत्तसेवा
ठाणे, ता. १० : राजकारणात नेहमीच सक्रिय असलेले राज्याचे उपमुख्यमंत्री एकनाथ शिंदे यांनी रविवारी (१० ऑगस्ट) ठाणे महापालिका आणि ठाणे जिल्हा ॲथलेटिक्स असोसिएशनने आयोजित केलेल्या मॅरेथॉन स्पर्धेत सहभाग घेऊन सर्वांना आश्चर्याचा धक्का दिला. तब्बल पाच वर्षांनंतर झालेल्या या मॅरेथॉनमध्ये शिंदे यांनी स्वतः धावत आपला फिटनेस सिद्ध केला, ज्यामुळे उपस्थितांमध्ये मोठा उत्साह संचारला.
ठाणे शहराची ३० वर्षांची परंपरा असलेली वर्षा मॅरेथॉन कोरोनामुळे थांबली होती. यंदा ती पुन्हा सुरू झाली. या स्पर्धेसाठी राज्य तसेच देशभरातून अनेक स्पर्धक सहभागी झाले होते. ठाणे महापालिका मुख्यालयाबाहेर या स्पर्धेचे उद्घाटन झाले. सकाळी ६.१५ वाजता उपमुख्यमंत्री एकनाथ शिंदे व्यासपीठावर आले. त्यांनी पुरुषांच्या गटाला हिरवा झेंडा दाखवून स्पर्धेची सुरुवात केली, तर त्यांच्या पत्नी लता शिंदे यांनी महिलांच्या गटाला झेंडा दाखवला.
विविध वयोगटांतील स्पर्धकांमध्ये स्पर्धा रंगली असताना, खरी मजा तेव्हा आली जेव्हा शिंदे स्वतः कॉर्पोरेट मॅरेथॉनमध्ये सहभागी झाले. ते रस्त्यावरून धावत असल्याचे पाहून अनेक नागरिक चकित झाले. शिंदेंना धावताना पाहून त्यांना प्रोत्साहन देण्यासाठी त्यांच्या बहिणीही या मॅरेथॉनमध्ये सहभागी झाल्या. त्यांचा उत्साह पाहून पालिका आयुक्त सौरभ राव यांनीही स्पर्धेत भाग घेतला. पालिका मुख्यालय ते पाचपाखाडी येथील साईबाबा मंदिरापर्यंत धावत शिंदे यांनी आपला फिटनेस दाखवून दिला.
दरम्‍यान, शिंदे यांचा मॅरेथॉनमधील सहभाग पाहून अनेकांनी त्यांचे मोबाईलमध्ये व्हिडिओ आणि रील्स बनवले, जे दिवसभर समाजमाध्यमांवर व्हायरल होत होते. त्यांच्या या कृतीमुळे केवळ मॅरेथॉनलाच नव्हे, तर फिटनेसलाही प्रोत्साहन मिळाल्याचे दिसून आले.

जो फिट असतो तोच धावतो
या वेळी बोलताना एकनाथ शिंदे म्हणाले, ‘‘धावल्याने आरोग्य चांगले राहते. पण जो खरोखर फिट असतो तोच धावू शकतो.’’ ठाण्यात होत असलेल्या या मॅरेथॉनमुळे तरुणांना ऊर्जा मिळत आहे, असेही त्यांनी सांगितले. तसेच ‘मॅरेथॉन ठाण्याची... ऊर्जा तरुणाईची’ हे घोषवाक्य खूप प्रेरणादायी असल्याचे त्यांनी सांगितले. ‘तू धाव, तू धाव.. घे क्षितिजाचा ठाव’ हे गाणेही त्यांना खूप आवडल्याचे त्यांनी म्हटले.