मोखाडा परिसरात एकजुटीचे दर्शन

मोखाडा, ता. १० (बातमीदार) : तालुक्यात जागतिक आदिवासीदिन मोठ्या जल्लोषात साजरा करण्यात आला. आदिवासी बांधवांची जीवनशैली व त्यांची ओळख दर्शवणारा पारंपरिक पेहराव, वेशभूषा, संस्कृतीचा वेगळेपणा जपणारा उत्सव, तसेच निसर्गावर अतुल्य प्रेम, जल, जंगल, जमिनीवरील निष्ठा, मानवतेवरील प्रेम, श्रद्धेने हा उत्सव साजरा होतो. याच निष्ठेने मोखाड्यात शनिवारी (ता. ९) संपूर्ण दिवसभर मोठ्या जल्लोषात हा उत्सव साजरा करण्यात आला. या कार्यक्रमात हजारो आदिवासी बांधवांनी एकजुटीचे दर्शन घडविले.

खोडाळा आणि मोखाडा बाजारपेठेतून रॅली काढून पारंपरिक वेशात डीजे, संबळ, तुतारी आणि तारपा वाद्यावर नृत्य केले. तालुक्यातील बाजारपेठांमध्ये जय आदिवासी, जय जोहार अशा घोषणांनी परिसर दणाणून गेला होता. तरुणाईचा संपूर्ण दिवस मोटारसायकलवर जल्लोष होता. यानंतर छत्रपती शिवाजी महाराज चौकात लावण्यात आलेल्या वीर आदिवासी क्रांतिकारकांच्या प्रतिमेला मान्यवरांच्या हस्ते पुष्पहार अर्पण करत पूजन करण्यात आले. याप्रसंगी आमदार हरिश्चंद्र भोये, माजी आमदार सुनील भुसारा, जिल्हा परिषदेचे माजी अध्यक्ष प्रकाश निकम, जिल्हा परिषद सदस्या कुसुम झोले, जिल्हा परिषद सदस्य हबीब शेख, मोखाडा नगराध्यक्ष अमोल पाटील, अशोक पाटील यांसह अनेक लोकप्रतिनिधी व मान्यवरांची उपस्थिती होती.

क्रांतिकारकांचे विचार मांडत आदर्श व्यक्तींचा सन्मान, नवनियुक्त कर्मचारी, सेवामुक्त कर्मचारी यांच्या सन्मानाचा कार्यक्रम ग्रामपंचायत कार्यालयातील सभागृहात घेण्यात आला. उपस्थित मान्यवरांनी क्रांतिकारकांच्या बलिदानाचे मोल, आपल्या विचाराद्वारे उपस्थितांसमोर मांडले. या वेळी आदिवासीदिन आयोजक समन्वय समितीचे सर्व सदस्य व मोठ्या संख्येने आदिवासी बांधव, महिला उपस्थित होत्या.