क्रॉफर्ड मार्केटमधून २२६ वन्यजीवांची सुटका

क्रॉफर्ड मार्केटमधून २२६ वन्यजीवांची सुटका
वन विभागाची कारवाई; एकाविरोधात गुन्हा दाखल
सकाळ वृत्तसेवा
ठाणे, ता. १० : क्रॉफर्ड मार्केटमध्ये वन्यजीवांची बेकायदा विक्री करणाऱ्या दुकान आणि गोदामावर वन विभागाने धाड टाकून तब्बल २२६ वन्यजीवांची सुटका केली आहे. या वेळी ११ रिंगनेक पोपट मृतावस्थेत आढळले. याप्रकरणी एका दुकानदाराला अटक केली असून, त्यास तीन दिवसांची पोलिस कोठडी सुनावण्यात आल्याची माहिती वन विभागाच्या अधिकाऱ्यांनी दिली.
ठाणे वन विभागाचा वन्यजीव विभाग, ठाणे वन्यजीव गुन्हे नियंत्रण ब्युरो, गस्ती पथक, मुंबई वनपरिक्षेत्र वन्यजीव आणि वाईल्ड लाईफ असोसिएशन यांनी ८ ऑगस्ट रोजी ही कारवाई केली. क्रॉफर्ड मार्केटमध्ये वन्यजीवांची बेकायदा विक्री केली जात असल्याची माहिती वन्यजीव कल्याण संस्थेमार्फत मिळाली होती. त्यानुसार मुंबई वन्यजीव वनपरिक्षेत्र अधिकारी शिल्पा शिगवण, मुंबई वन्यजीव परिमंडळाचे वनपाल संजय गिरी आणि वनरक्षक राकेश पाटील यांच्या पथकाने ही कारवाई केली. याप्रकरणी संबंधित दुकानदाराविरुद्ध विविध कलमांतर्गत गुन्हे नोंदविण्यात आले. तसेच जप्त केलेले वन्यजीव व पक्ष्यांना सुरक्षितस्थळी हलविण्यात आले आहे. वन्यजीवांच्या बेकायदा व्यापारास आळा घालण्यासाठी अशी संयुक्त कारवाई भविष्यातही सुरू राहील, असे वन विभागाकडून स्पष्ट करण्यात आले आहे.
----
ताब्यात घेतलेले वन्यजीव
अलेक्झांड्रिन पोपट १०
रिंगनेक पोपट ११२
इंडियन स्टार कासव ६७
इंडियन टेंट कासव १०
इंडियन रुफ्ड कासव १६
इंडियन आय कासव १०
इंडियन सॉफ्टशेल कासव १
----
वन विभागाचे आवाहन
बेकायदा वन्यप्राणी बाळगणे, विक्री वा शिकार करणे याबाबत माहिती मिळताच नजीकच्या वन विभागास तसेच वन विभागाचे टोल फ्री क्रमांक १९२६ याच्यावर तत्काळ माहिती द्यावी, असे आवाहन वन विभागाकडून करण्यात आले आहे.