इंटरनेटवर तरुणीचे फोटो मॉर्फ करून अश्लील व्हिडिओ

अंबरनाथमध्ये तरुणीचे फोटो मॉर्फ करून अश्लील व्हिडिओ
लॉरेन्स बिश्नोईच्या नावाने धमकी; पोलिस ठाण्यात गुन्हा दाखल
अंबरनाथ, ता. १० (वार्ताहर) : अंबरनाथमध्ये एका २५ वर्षीय तरुणीचे फोटो मॉर्फ करून त्याचे अश्लील व्हिडिओ इंटरनेटवर अपलोड केल्याचा धक्कादायक प्रकार समोर आला आहे. अज्ञात आरोपीने कुख्यात गुंड लॉरेन्स बिश्नोईच्या नावाने इन्स्टाग्राम आयडी तयार करून पीडित तरुणीला धमकावल्याचाही आरोप आहे. याप्रकरणी शिवाजीनगर पोलिस ठाण्यात गुन्हा दाखल करण्यात आला असून, पोलिस अधिक तपास करीत आहेत.
पीडित तरुणी एका खासगी कंपनीत काम करते. आरोपीने ८ फेब्रुवारी २०२५ ते ७ ऑगस्ट २०२५ या कालावधीत Lawrence_bishnoi_70 आणि akshay22117734 या इन्स्टाग्राम आयडीवरून तिला वारंवार फ्रेंड रिक्वेस्ट आणि मेसेजेस पाठवले.
तरुणीने प्रतिसाद न दिल्याने आरोपीने तिचे फोटो घेऊन ते मॉर्फ केले आणि त्याचे अश्लील व्हिडिओ तयार करून इंटरनेटवर अपलोड केले. या घटनेनंतर घाबरलेल्या तरुणीने तत्काळ शिवाजीनगर पोलिस ठाण्यात तक्रार दाखल केली. पोलिसांनी अज्ञात आरोपीविरोधात गुन्हा नोंदवला असून, मोबाईल नंबर आणि तांत्रिक विश्लेषणाच्या आधारे पोलिस उपनिरीक्षक के. पी. हासगुळे पुढील तपास करीत आहेत.