पर्यावरण संवेदनशील क्षेत्र रद्द होण्यासाठी खासदारांना दिले निवेदन

पर्यावरण संवेदनशील क्षेत्र रद्द होण्यासाठी खासदारांना निवेदन
झोन उठविण्यासाठी प्रयत्न करणार : धैर्यशील पाटील
रोहा, ता. १३ (बातमीदार) ः केंद्र सरकारकडून लागू होत असलेल्या वन पर्यावरण संवेदनशील क्षेत्राच्या कामाला वेग आला आहे. यानुसार संबंधित तलाठ्याकडून ग्रामस्थांना नोटीस देऊन हरकती मागविण्यात आल्या आहेत. याविषयी तालुक्यातील देवकान्हे, धानकान्हे, चिल्हे व तळवली या ग्रामस्थांनी एकत्र येऊन सोमवारी (ता. ११) खासदार धैर्यशील पाटील यांची पेण येथील निवासस्थानी भेट घेतली आणि हरकतीचे निवेदन देत या क्षेत्रासंदर्भात आपला विरोध दर्शविला.
या भेटीदरम्यान धैर्यशील पाटील यांनी शेतकऱ्यांना धीर देत आपण सदैव शेतकऱ्यांच्या मागे ठाम आहोत. झोन उठवण्यासाठी आपण शासन दरबारी नक्कीच प्रयत्न करणार असून, अधिवेशनात हा प्रश्न उपस्थित करणार असल्याची भूमिका स्पष्ट केली.
स्थानिक ग्रामस्थांशी संवाद साधत असताना ते म्हणाले की, यापूर्वी २०१३-१४ मध्ये गाडगीळ समितीने पर्यावरणासंदर्भात दिलेला अहवाल आणि याबाबतची अधिसूचना त्यानंतर पुन्हा कस्तुरीरंगन समितीने काही भाग कमी करण्यात आला होता. त्यामुळे याबाबतीत शेतकऱ्यांनी गाफील न राहता संघटित होऊन यावर हरकती घेण्याची गरज असल्याचे पाटील यांनी सांगितले.
देवकान्हे माजी सरपंच ज्ञानेश्वेर भोईर, तळवलीतर्फे अष्टमीचे धनाजी लोखंडे, वसंतराव मरवडे, सदस्य संदीप महाडिक, ग्रामस्थ रामचंद्र मरवडे, धोंडू कचरे, सखाराम कचरे, राम महाडिक, सुरेश महाडिक, युवा शेतकरी किशोर भोईर, संदीप लोखंडे, सुनील महाडिक, जितेंद्र खांडेकर, राम लोखंडे, तुकाराम कोंडे, पांडुरंग गोसावी, सुशील साबळे, विश्वास राऊत, शशिकांत भोईर, ज्ञानेश्वर भोईर, नंदू भोईर आदी ग्रामस्थ व शेतकरी उपस्थित होते.

फोटो ओळ :
पर्यावरण संवेदनशील क्षेत्राविरोधात ग्रामस्थांनी धैर्यशील पाटील यांना निवेदन दिले.