मालमत्ता कराविरोधात पोलखोल मोर्चा

मालमत्ता कराची उद्या पोलखोल
पनवेल पालिकेवर मविआचा मोर्चा धडकणार
कामोठे, ता. ११ (बातमीदार) : पनवेल महापालिकेने लादलेल्या मालमत्ता कराविरोधात जनतेच्या मनात रोष आहे. त्यामुळे शास्ती नाही, तर मालमत्ता कर माफ करण्याच्या मागणीसाठी बुधवारी (ता. १३) महाविकास आघाडीकडून पोलखोल मोर्चा काढण्यात येणार आहे.
मालमत्ता करावरून महापालिका क्षेत्रात राजकीय रणकंदन सुरू आहे. सत्ताधारी भाजप आणि महाविकास आघाडीत एकमेकांविरोधात आरोप-प्रत्यारोपांच्या फैरी सुरू आहेत. राज्य सरकारने मालमत्ता करावरील शास्ती माफी केल्याने भाजप नेत्यांनी सहानुभूती मिळण्याचा प्रयत्न सुरू केला आहे, मात्र शास्ती माफ करण्याच्या निर्णयाविरोधात मविआ, सामाजिक संघटना आक्रमक आहेत. याच अनुषंगाने त्याविरोधात महाविकास आघाडीच्या वतीने बुधवारी (ता. १३) सकाळी १० वाजता पालिका मुख्यालयावर मोर्चा काढला जाणार आहे.
-------------------------------------
आंदोलकांचे आक्षेप
- महाविकास आघाडीने मालमत्ता करावरील शास्ती माफीला विरोध केला आहे. महापालिका निवडणुकीत सत्ताधाऱ्यांनी पाच वर्षे करवाढ करणार नसल्याचे आश्वासन दिले होते. या आश्वासनाचा सत्ताधाऱ्यांना विसर पडला आहे.
- पनवेल महापालिका ‘ड’ वर्गात असताना ‘अ’ वर्ग असलेल्या मुंबई, ठाणे महापालिकेप्रमाणे कर आकारत आहे. नवी मुंबई पालिकेत २० वर्षे मालमत्ता कर ग्रामपंचायत दराने आहे. ५०० चौरस मीटर घरांना मालमत्ता करातून मुक्ती आहे.
-----------------------------------------
मनसेचा सहभाग
महाविकास आघाडीत नसलेला मनसे मोर्चात सहभागी होणार आहे. याच अनुषंगाने महाविकास आघाडीच्या प्रमुख पदाधिकाऱ्यांची रविवारी कामोठेत बैठक झाली. मोर्चाच्या नियोजनाबाबत बैठकीत चर्चा झाली. त्यामुळे हा मुद्दा आगामी काळात कळीचा ठरणार आहे.