पोलिस असल्याची बतावणी करत अंगठी चोरी

उल्हासनगर, ता. ११ (वार्ताहर) : ‘आम्ही पोलिस आहोत’ असा दम देत दोन व्यक्तींनी ५९ वर्षीय नागरिकाला बसमधून उतरवून रिक्षामधून फिरवत त्यांची सोन्याची अंगठी लंपास केल्याची घटना घडली आहे. विश्वास संपादन करून फसवणूक करण्याच्या या थरारक प्रकारामुळे परिसरात खळबळ उडाली आहे.
विठ्ठलवाडी पोलिस ठाण्याच्या हद्दीत ८ ऑगस्टला रात्रीच्या सुमारास तुकाराम कदम (वय ५९) हे व्हिनस चौकातून खेमाणी मार्गाकडे बसने प्रवास करत होते. त्याचवेळी एका अनोळखी व्यक्तीने त्यांना थांबवत, मी पोलिस आहे, तुम्ही मोबाईल फोडला आहे, गाडीतून खाली उतरा, असा दम दिला. अचानक पोलिसांचे नाव ऐकून घाबरलेले कदम हे बसमधून खाली उतरले. यानंतर दुसऱ्या व्यक्तीने रिक्षा थांबवून कदम यांना त्यात बसवले. लालचक्की चौक, कालीमाता चौक, संभाजी चौक, भाटिया चौक आणि कैलास कॉलनी अशा विविध ठिकाणी फिरवत त्यांनी संवाद साधला. विश्वास संपादन करून आरोपींनी त्यांच्या हातातील चार ग्रॅम वजनाची सोन्याची अंगठी घेतली आणि पसार झाले.
या घटनेनंतर कदम यांनी तत्काळ विठ्ठलवाडी पोलिस ठाण्यात तक्रार नोंदवली. पोलिसांनी दोन अनोळखी व्यक्तींविरोधात गुन्हा दाखल केला आहे. गुन्ह्याचा तपास सहाय्यक पोलिस निरीक्षक कुलकर्णी यांच्या मार्गदर्शनाखाली सुरू आहे.