भातपिकावर खोडकिडीचा प्रादुर्भाव

भातपिकावर खोडकिडीचा प्रादुर्भाव
कृषी विभागाची तत्पर कारवाई; शेतकऱ्यांना दिलासा
अलिबाग, ता. ११ (वार्ताहर) ः अलिबाग तालुक्यातील कुरूळ आणि बेलकडे या गावांमध्ये भातपिकावर निळे भुंगेरे व खोडकिडीचा प्रादुर्भाव आढळून आला आहे. पिकाच्या सुरुवातीच्या टप्प्यावरच वाढलेला हा प्रादुर्भाव शेतकऱ्यांसाठी चिंतेचा विषय ठरत असताना, कृषी विभागाने तातडीने हस्तक्षेप करून परिस्थिती नियंत्रणात आणली आहे.
कुरूळ येथे जे. एस. पाटील यांच्या शेतात निरीक्षणादरम्यान भातपिकावर खोडकिडीचा मोठ्या प्रमाणात प्रादुर्भाव दिसून आला. त्यानंतर बेलकडे गावातील एस. बी. पाटील यांच्या शेतात केवळ खोडकिडाच नव्हे, तर निळ्या भुंग्यांचाही फैलाव झालेला आढळला. हा प्रादुर्भाव अधिक पसरू नये यासाठी, क्रॉपसॅप अंतर्गत जिल्हा अधीक्षक कृषी अधिकारी वंदना शिंदे, कृषी विज्ञान केंद्र, रोहा येथील शास्त्रज्ञ डॉ. जिवन आरेकर, कृषी उपसंचालक रायगड, तंत्र अधिकारी रायगड, मंडळ कृषी अधिकारी नागाव, उपकृषी अधिकारी खंडाळा, सहाय्यक कृषी अधिकारी बेलकडे तसेच स्थानिक शेतकरी यांच्या उपस्थितीत प्रत्यक्ष पाहणी करण्यात आली. यावेळी तज्ज्ञांनी शेतकऱ्यांना भातपिकावरील कीड ओळख, तिची जीवनशैली, पिकावर होणारे परिणाम आणि वेळेवर घेण्याच्या उपाययोजनांबाबत मार्गदर्शन केले. खोडकिड व निळे भुंगेरे नियंत्रणासाठी योग्य कीटकनाशकांची निवड, फवारणीचे प्रमाण व वेळ, तसेच पाणी व्यवस्थापनाच्या पद्धतींचा सविस्तर सल्ला देण्यात आला.
..............
तत्काळ उपाययोजना
निरीक्षणानंतर शेतकऱ्यांनी ताबडतोब शिफारस केलेल्या औषधांची फवारणी सुरू केली. तसेच कृषी विभागाने संबंधित ॲडव्हायझरीची छपाई करून ती शेतकऱ्यांना वितरित केली आणि ग्रामपंचायतीच्या नोटीस बोर्डवरही ती लावली. या एकत्रित प्रयत्नांमुळे भातपिकावरील कीड प्रादुर्भाव आटोक्यात आला असून, सध्या पिकांची वाढ समाधानकारक असल्याचे अधिकाऱ्यांनी सांगितले.
जिल्हा कृषी अधीक्षक वंदना शिंदे यांनी सांगितले की, शेतकऱ्यांनी योग्य वेळी उपाययोजना केल्याने प्रादुर्भावावर नियंत्रण मिळवणे शक्य झाले. यापुढेही शेतकऱ्यांनी पिकाची नियमित तपासणी करून वेळेवर फवारणी करावी.