इथे एकच लेन, बाजूला रस्ताच नाही

अपूर्ण कामांमुळे वाहतूक ठप्प
कल्याण-शिळ रस्त्याचे रुंदीकरण रखडले
सकाळ वृत्तसेवा
डोंबिवली, ता. ११ : कल्याण-शिळ रोडवरील तासनतास होणाऱ्या वाहन कोंडीवर सातत्याने नाराजी व्यक्त होत आहे. एकीकडे या रस्त्याच्या मध्यभागी मेट्रोचे काम सुरू आहे, तर दुसरीकडे रस्त्याचे रुंदीकरण अद्याप पूर्ण न झाल्यामुळे वाहतूक ठप्प झाली आहे. आगामी पालिका निवडणुकीच्या पार्श्वभूमीवर मेट्रो कामांना वेग आला असला तरी वर्षानुवर्षे अडकलेल्या रुंदीकरणाच्या समस्येवर अद्याप तोडगा नाही. स्थानिक नागरिक आणि वाहनचालक या परिस्थितीमुळे तंग आहेत.

कल्याण-शिळ रोडचे सिमेंट काँक्रीटीकरण झाले असून, हा रस्ता सहा लेनचा होण्याचा प्रस्ताव होता; मात्र जमीन हस्तांतरणाच्या अडचणींमुळे आणि स्थानिक भूमिपुत्रांना योग्य मोबदला न दिल्यामुळे काम अर्धवटच राहिले. त्यामुळे सध्या हा रस्ता फक्त चार लेनचा पूर्ण झाला असून, काही ठिकाणी पाच लेनचे काम सुरू आहे. मेट्रो कामासाठी नव्याने तयार केलेला सिमेंटचा रस्ता पुन्हा खोदण्यात आला असून, या कामासाठी दोन मार्गिका बंद करण्यात आल्या आहेत. परिणामी केवळ दोन्ही दिशांनी एक-एक लेन वापरून वाहने मार्गक्रमण करीत आहेत.

कल्याण-शिळ रोडवरील वाहन कोंडी ही रोजचीच समस्या बनली आहे. पालिकेने नुकताच पलावा येथील उड्डाणपुलाचे उद्घाटन केले, ज्यामुळे काही प्रमाणात कोंडी कमी होण्याची अपेक्षा होती, मात्र खड्डे आणि काटई नाकाजवळील रुंदीकरण अडचणींमुळे ती अपेक्षा फोल ठरली. रक्षाबंधन आणि रविवारच्या सुट्टीनिमित्त नागरिक मोठ्या संख्येने बाहेर पडले आणि त्या दिवशी चार ते पाच तासांची अभूतपूर्व कोंडी झाली. या कोंडीमुळे पुन्हा एकदा कल्याण शिळ रोडची दुर्दशा चर्चेचा विषय झाली.

अपघाताची भीती
मार्गावर फक्त एकच लेन चालू असून, पाचवी आणि सहावी लेन खड्डे, पाणी तळी आणि उभी वाहने यामुळे वापरात नाही. दुचाकीस्वार आणि रिक्षाचालक धोकादायक रस्त्यावर प्रवास करतात. खड्ड्यांमुळे रिक्षा एका बाजूला कलंडत असून, अपघात घडण्याची शक्यता वाढते. तसेच दुचाकीस्वार मोठ्या वाहनाखाली येण्याचा धोका घेत आहेत.

हस्तांतरणाचा प्रश्न
पाचव्या आणि सहाव्या लेनसाठी आवश्यक जागा अजूनही पूर्णपणे हस्तांतरण झाले नाही. जरी मोबदला मंजूर झाला तरी तो शेतकऱ्यांच्या हाती पोहोचला नाही, ज्यामुळे भूमिपुत्र जमीन देण्यास नकार देत आहेत. हे प्रश्न अनेक वर्षांपासून अनुत्तरित आहेत.

निवडणुकीपूर्वी प्रशासनाकडे मागणी
आता मेट्रो काम वेगाने सुरू असल्यामुळे नागरिक आणि वाहनचालक प्रश्न उपस्थित करतात की, “मेट्रो काम होत आहे, तर रुंदीकरणाचे कामही लवकर शक्य होणार नाही का?” त्यांनी निवडणुकीनंतर उड्डाणपुलाच्या कामासारखेच रस्त्याच्या कामातही त्वरित प्रगती होण्याची अपेक्षा व्यक्त केली आहे.

वाहतूक नियंत्रण आणि समस्या
कोंडीवर नियंत्रण ठेवण्यासाठी वाहतूक पोलिस आणि ट्रॅफिक वॉर्डन तैनात आहेत, मात्र वाढणाऱ्या कोंडीसमोर तेही हतबल आहेत. केवळ वाहनचालकांना सूचना देण्यापुरतेच त्यांचे काम मर्यादित आहे.