वनविभागाचा आश्वासनांच्या पूर्ततेला हरताळ

शहापूर, ता. ११ (वार्ताहर) : तालुक्यातील कळंबे गावाच्या हद्दीत उभ्या केलेल्या खासगी गृहसंकुलाचे रहिवासी वनजमिनीतून रस्त्याचा वापर केला जात आहे. या गृहसंकुलात वनजमिनीतून जाणारा हा रस्ता कायमस्वरूपी बंद करण्यात यावा, या मागणीसाठी बळीराज सेनेने बुधवारी (ता. १३) तिसऱ्यांदा उपवनसंरक्षक कार्यालयाच्या आवारात बेमुदत उपोषणाला बसण्याची तयारी सुरू केली आहे.
कळंबे गावाच्या परिसरात रॉयल सिटी नावाचा गृहसंकुल प्रकल्प उभारण्यात आला आहे. या संकुलात जाण्यासाठी वनजमिनीचा उपयोग केला जात आहे. यामुळे पर्यावरण राखण्याच्या दृष्टीने खासगी बांधकाम व्यावसायिकाच्या प्रकल्पाला वनजमिनीचा उपयोग करू देऊ नये, अशी मागणी सेनेचे शहापूर तालुका संपर्कप्रमुख दशरथ भोईर यांनी केली आहे. या मागणीसाठी सेनेच्या पदाधिकाऱ्यांनी मार्च व एप्रिल महिन्यात दोनदा उपोषण केले होते. उपोषणाच्या अनुषंगाने वनजमिनीचा वापर टाळण्यासाठी रस्ता बंद करण्याचे लेखी आश्वासन वनाधिकाऱ्यांनी देऊनही कारवाई झाली नाही. अखेर बुधवारी सेनेच्या कार्यकर्त्यांनी तिसऱ्यांदा उपोषण करण्याची तयारी दर्शवली आहे. उपोषण आंदोलनाचे निवेदन उपवनसंरक्षकांना देण्यात आले आहे.

शहापूर उपवनसंरक्षक खासगी बांधकाम व्यावसायिकाला पाठीशी घालत आहेत. वनविभागाच्या आशीर्वादानेच विकसक वनजमिनीचा बिनदिक्कत वापर करत आहे. वनजमिनीच्या संरक्षणासाठी हे तिसऱ्यांदा उपोषण करणार आहेत. या वेळी प्रश्न कायमचा सुटला नाही, तर मुंबई उच्च न्यायालयात दाद मागण्यात येईल.
- दशरथ भोईर, संपर्कप्रमुख, बळीराज सेना, शहापूर

शहापूर : सहाय्यक उपवनसंरक्षक अभिजित पिंगळे यांना बळीराज सेनेच्या कार्यकर्त्यांनी निवेदन दिले.