नेरूळ रेल्वे स्थानकात स्वयंचलित जिन्यांची मागणी

नेरूळ रेल्वेस्थानकात स्वयंचलित जिन्यांची मागणी
जुईनगर, ता. ११ (बातमीदार) ः नेरूळ रेल्वेस्थानकातील प्रवाशांना उंच आणि लांब जिन्यांचा सामना करावा लागतो. ज्येष्ठ नागरिक, गरोदर महिला, लहान मुले, रुग्ण तसेच दिव्यांग प्रवाशांसाठी हा प्रवास अधिकच कष्टदायक ठरत आहे. त्यामुळे या ठिकाणी स्वयंचलित जिने (एस्केलेटर) बसवावेत, अशी मागणी स्थानिक नागरिक आणि विविध सामाजिक संस्थांनी केली आहे.
मुंबईतील अनेक रेल्वेस्थानकांमध्ये आधीच स्वयंचलित जिने बसवले आहेत, मात्र नवी मुंबईतील महत्त्वाची स्थानके अजूनही या सुविधेपासून वंचित आहेत. नवी मुंबईतील स्थानके सिडकोच्या अखत्यारीत असल्याने, सिडको प्रशासनाने तातडीने हा विषय लक्षात घेण्याची गरज आहे, असे संतोष सुतार यांनी नमूद केले.
नेरूळ हे नवी मुंबईचे प्रमुख स्थानक आहे. येथे शिकवणी वर्ग, रुग्णालये व दवाखाने मोठ्या प्रमाणात असल्याने विद्यार्थ्यांची, रुग्णांची आणि पालकांची ये-जा लक्षणीय आहे. स्थानकातील सध्याचे जिने उंच असून, पायऱ्या चढणे अनेकांना अवघड जाते. या पार्श्वभूमीवर स्वयंचलित जिन्यांची गरज असल्याचे सांगण्यात येत आहे. दरम्यान, दिव्यांगांच्या वतीने आवाज उठवत, केअर अपंग संस्थाचे अध्यक्ष ॲड. निरंत वासुदेव पाटील यांनी सांगितले, आम्हाला उदरनिर्वाहासाठी नियमित रेल्वे प्रवास करावा लागतो, परंतु प्लॅटफॉर्मवर जाण्यासाठी लांब आणि उंच जिने चढणे हे आमच्यासाठी मोठे आव्हान आहे. विजेवर चालणारे जिने बसवले, तर आम्हाला इतर प्रवाशांप्रमाणेच सुलभ आणि सुरक्षित वाहतूक मिळेल. ही केवळ सुविधा नसून, आमच्या स्वातंत्र्याचा हक्क आहे.
दिव्यांगांसाठी चांगले काम करणारी महापालिका म्हणून नवी मुंबई महापालिकेचा लौकिक असला, तरी रेल्वेस्थानकांवरील दिव्यांगांच्या अडचणी दूर करण्यासाठी अधिक प्रयत्न होणे आवश्यक आहे, असा सूर नागरिकांमध्ये दिसून येतो.