पंडित दिनदयाळ चौक सात दिवस वाहतुकीसाठी बंद

पंडित दीनदयाळ चौक सात दिवस वाहतुकीसाठी बंद
सकाळ वृत्तसेवा
डोंबिवली, ता. ११ : डोंबिवली पश्चिम रेल्वे स्थानकाजवळील पंडित दीनदयाळ रस्त्यावर असलेल्या धोकादायक इमारतीच्या पाडकामासाठी प्रशासनाने पुढील सात दिवसांसाठी वाहतूक बंदी लागू केली आहे. ही वाहतूक बंदी ११ ते १८ ऑगस्टपर्यंत लागू असून, दररोज सकाळी नऊ ते संध्याकाळी सहा या वेळेत काम सुरू राहणार आहे. वाहतूक विभागाचे उपायुक्त पंकज शिरसाट यांनी यासंदर्भात अधिसूचना जारी केली असून, या कालावधीत कोपर पुलाजवळील हॉटेल रणजितपासून पंडित दीनदयाळ चौक (जुने द्वारका हॉटेल) पर्यंत सर्व प्रकारची वाहतूक बंद ठेवण्यात येणार आहे.

सोमवारी (ता. ११) या इमारतीचे तोडकाम सुरू झाले आहे. मुख्य वर्दळीच्या रस्त्यावर हे काम करण्यात येणार असल्याने या कालावधीत पंडित दीनदयाळ चौककडे येणारी सर्वप्रकारची वाहतूक कोपर पुलाजवळील हॉटेल रणजित येथे बंद करण्यात येणार आहे. सकाळी नऊ ते संध्याकाळी सहा या वेळेत हे तोडकाम सुरू राहणार आहे. गेल्या एप्रिलमध्ये असेच तोडकाम या भागात केले होते. त्या वेळीही या रस्त्याची एक मार्गिका वाहतुकीसाठी वाहतूक विभागाच्या नियोजनाप्रमाणे बंद ठेवण्यात आली होती.

पंडित दीनदयाळ चौकाकडे (जुने सम्राट हॉटेल) येणारी सर्व प्रकारची वाहने सात दिवस बंद राहणार असल्याने ही वाहने हॉटेल रणजित येथे डावे वळण घेऊन जुनी डोंबिवली देवी चौकमार्गे किंवा जोंधळे हायस्कूलसमोरून स्वामी विवेकानंद विद्यामंदिर, विष्णुनगर विभागाकडून पंडित दीनदयाळ रस्त्याने सम्राट चौक, माणकोली पुलाकडे जातील, असे वाहतूक विभागाचे उपायुक्त पंकज शिरसाट यांनी जाहीर केले आहे. धोकादायक इमारत तोडण्यात येणारा भाग डोंबिवली पश्चिम रेल्वे स्थानकाजवळील परिसर आहे. या भागात रिक्षा वाहनतळ, शालेय बस, अवजड वाहने, माणकोली पुलाकडून येणारी-जाणारी वाहने यांची वर्दळ असते. त्यामुळे या सात दिवसांच्या कालावधीत या भागात वाहतूक कोंडी होणार नाही, यासाठी ठेकेदार आणि वाहतूक विभागाने आवश्यक वाहतूक पोलिस, खासगी सुरक्षा रक्षक या भागात तैनात ठेवण्याची मागणी नागरिकांकडून करण्यात येत आहे.

शालेय विद्यार्थ्यांना फटका
कालावधीत अत्यावश्यक सेवेतील रुग्णवाहिका, गॅस सिलिंडर, ऑक्सिजन सिलिंडर, ग्रीन कॉरिडॉर, पोलिस, अग्निशमन दलाच्या वाहनांना या भागातून प्रवेश असेल. पंडित दीनदयाळ चौक भागातून जुनी डोंबिवली, मोठा गाव, ठाकूरवाडी, देवीचा पाडा, आनंदनगर भागात वाहने धावतात. माणकोली पुलाकडून धावणाऱ्या वाहनांची या भागातील संख्या अधिक आहे. याशिवाय शाळेतील बस अधिक प्रमाणात याच रस्त्यावरून धावतात. त्यामुळे या तोडकामाचा प्रवासी, शालेय विद्यार्थ्यांना फटका बसणार नाही याची विशेष काळजी धेण्याची प्रवासी, शिक्षण संस्था संचालकांची मागणी आहे.