नवी मुंबईत लोकसहभागातून सार्वजनिक स्थळांची स्वच्छता

नवी मुंबईत लोकसहभागातून सार्वजनिक स्थळांची स्वच्छता
वाशी, ता. १२ (बातमीदार) : ‘हर घर तिरंगा’ मोहिमेच्या अनुषंगाने नवी मुंबई महापालिकेच्या वतीने नागरिकांच्या सहभागातून शहरातील विविध सार्वजनिक स्थळांवर विशेष स्वच्छता मोहिमा राबविण्यात आल्या. तिरंग्याविषयीचा राष्ट्राभिमान जागविण्यासोबतच स्वच्छतेचे महत्त्व अधोरेखित करण्यासाठी हा उपक्रम राबविण्यात आला.
महापालिका आयुक्त डॉ. कैलास शिंदे यांच्या मार्गदर्शनाखाली, अतिरिक्त आयुक्त सुनील पवार यांच्या नियंत्रणाखाली तसेच घनकचरा व्यवस्थापन विभागाचे उपआयुक्त डॉ. अजय गडदे व स्मिता काळे, परिमंडळ १ चे उपआयुक्त सोमनाथ पोटरे, परिमंडळ २ चे उपआयुक्त संजय शिंदे आणि मुख्य स्वच्छता अधिकारी राजेंद्र इंगळे यांच्या निरीक्षणाखाली ही मोहीम पार पडली. बेलापूर व नेरूळ विभागांनी संयुक्तपणे ‘ज्वेल ऑफ नवी मुंबई’ परिसरात स्वच्छता मोहीम राबवून तब्बल ५२ गोणी कचरा संकलित केला. यात एसआयईएस महाविद्यालयाच्या एनएसएस युनिटमधील विद्यार्थी, स्थानिक नागरिक आणि स्वच्छताकर्मींचा उत्स्फूर्त सहभाग होता. वाशी विभागात मिनी सी-शोअर, जुहूगाव चौपाटी परिसरात टिळक कॉलेजचे एनएसएस विद्यार्थी सहभागी झाले, तर तुर्भे विभागात सेक्टर १०, सानपाडा येथील ट्री बेल्ट परिसरात पिल्लई कॉलेजच्या विद्यार्थ्यांनी उत्साहाने स्वच्छतेत हातभार लावला. कोपरखैरणे विभागात सेक्टर-१९ खाडी रोडवर सखोल स्वच्छता मोहीम राबविण्यात आली. सर्व ठिकाणी प्रामुख्याने प्लॅस्टिक बाटल्या, पिशव्या, रॅपर्स, सिंगल-यूज प्लॅस्टिक, कागद, कापड आदी कचरा गोळा करून गोण्यांमध्ये भरून घनकचरा व्यवस्थापन प्रकल्पस्थळी पाठविण्यात आला.