म्हसळ्यात गौवंश हत्येने खळबळ

म्हसळ्यात गौवंश हत्येने खळबळ
तीन आरोपींना अटक, तीन लाखांचा मुद्देमाल जप्त

श्रीवर्धन, ता. ११ (बातमीदार) : श्रीवर्धन आणि म्हसळा तालुक्यातील सततच्या गौवंश चोरीच्या मागे मोठे रॅकेट असल्याची चर्चा सुरू असतानाच रविवारी (ता. १०) पोलिसांनी एका फार्महाउसवर छापा टाकून गौवंश हत्या उघडकीस आणली.
याबाबतीत पोलिसांकडून मिळालेली माहिती अशी, की रविवारी दुपारी चारच्या सुमारास म्हसळा-श्रीवर्धन रोडवरील जांभूळ गावाच्या हद्दीतील या फार्महाउसवर पोलिसांनी धाड टाकली. घटनास्थळी खोंडाची कत्तल झाल्याचे पोलिसांना आढळून आले. पोलिसांनी तीन लाखांचा टेम्पो, ४० हजारांचे मांस आणि १,१०० रुपयांना खरेदी केलेली शस्त्रे जप्त केली. याप्रकरणी सलमान नजीर डावरे (वय ४०, रा. म्हसळा), रायान रफिक हुरझुक (२२, रा. सुरई, म्हसळा) आणि मेहरान शफी पेणकर (१९, रा. म्हसळा) या तिघांना अटक करण्यात आली आहे. या सर्व आरोपींवर भारतीय न्याय संहिता २०२३, महाराष्ट्र प्राणी संरक्षण अधिनियम १९७६ आणि प्राण्यांना क्रूरतेने वागविण्यावर प्रतिबंध अधिनियम १९६०च्या विविध कलमांन्वये गुन्हे दाखल झाले आहेत. पुढील तपास उपनिरीक्षक ज्ञानेश्वर येडवले करीत आहेत. संबंधित फार्महाउसचे मालक मुबीन हुरझुक हे आहेत. दरम्यान, गेल्या काही महिन्यांमध्ये म्हसळ्यात गोवंश कत्तलप्रकरणी चार ते पाच घटना उघडकीस आल्याने म्हसळा पोलिसांनी कारवाईचा वेग आणखी वाढवला आहे. कधी वाहतूक करताना तर कत्तल खाण्यावर धाड टाकण्याच्या म्हसळा पोलिसांच्या गुप्त कारवायांमुळे आरोपी धास्तावले गेल्याची चर्चा सुरू आहे.
...
या गुन्ह्यात फार्महाउसच्या मालकाचा सहभाग आहे का, याबाबत तपास सुरू आहे. त्यानंतर कारवाई करण्यात येईल. अशा गुन्ह्यांवर आम्ही तत्काळ कारवाई करीत आहोत.
- संदीप कहाळे, सहाय्यक पोलिस निरीक्षक, म्हसळा