हमालांचे हाेणार आर्थिक सर्वेक्षण

हमालांचे हाेणार आर्थिक सर्वेक्षण

रेल्वे बोर्डाची तयारी; रोजगार व सामाजिक सुरक्षेसाठी पाऊल

सकाळ वृत्तसेवा
मुंबई, ता. ११ : देशभरातील सर्व रेल्वेस्थानकांवरील रेल्वे हमालांच्या आर्थिक स्थितीचे सर्वेक्षण करण्याचा निर्णय रेल्वे प्रशासनाने घेतला आहे. रोजगार व सामाजिक सुरक्षा पुरवण्याच्या उद्देशाने रेल्वे बोर्डाकडून या सर्वेक्षणाची तयारी सुरू आहे. त्याची जबाबदारी संबंधित विभागीय रेल्वे व्यवस्थापकांवर (डीआरएम) सोपविण्यात आली आहे.

सहा महिन्यांपासून राष्‍ट्रीय कुली माेर्चातर्फे हमालांच्या रोजगार आणि सामाजिक सुरक्षेसाठी मोहीम राबवली जात आहे. या पार्श्वभूमीवर हा निर्णय घेण्यात आला आहे. संघटना आपल्या पातळीवरही सर्वेक्षण करणार असून, त्याचा अहवाल रेल्वेमंत्री अश्विनी वैष्णव यांना सादर केला जाणार असल्याची माहिती राष्ट्रीय कुली मोर्चाचे समन्वयक राम सुरेश यादव यांनी दिली.

प्रतिनिधींनी विविध राजकीय पक्षांचे नेते, खासदार यांना निवेदने, रेल्वेमंत्र्यांना मागणीपत्र पाठविण्यात आले होते. संसदेतही कुलींच्या उपजीविकेचा मुद्दा मांडण्यात आला आहे. या प्रक्रियेनंतर रेल्वे मंत्रालयाने देशातील सर्व डीआरएम यांना कुलींच्या स्थितीची चौकशी करून अहवाल सादर करण्याचे निर्देश दिले आहेत.