कुलाब्यातील बंद झालेल्या शाळांतील विद्यार्थ्यांना ऑनलाईन सक्ती

बंद झालेल्या शाळांतील विद्यार्थ्यांना ऑनलाइनची सक्ती
सक्तीविराेधात पालिकेवर मोर्चा काढणार; मकरंद नार्वेकर
सकाळ वृत्तसेवा
मुंबई, ता. ११ : कुलाब्यातील दोन शाळा असुरक्षित असल्याने पर्यायी व्यवस्था न करता त्या बंद करण्यात आल्या आहेत. या शाळांतील सुमारे १,५०० विद्यार्थ्यांना ऑनलाइन शिक्षण घेण्याची सक्ती करण्यात आली आहे. या निर्णयाविरोधात आज कुलाबा महापालिका शाळेच्या समोर पालक आणि विद्यार्थ्यांनी निदर्शने केली. कुलाब्याचे माजी भाजप नगरसेवक मकरंद नार्वेकर यांच्या नेतृत्वात ही निदर्शने करण्यात आली. पालिकेने दोन दिवसांत या विद्यार्थ्यांच्या शिक्षणासाठी पर्यायी जागा उपलब्ध करून द्यावी, अशी मागणी नार्वेकर यांनी केली आहे. दुर्लक्ष केल्यास सर्व विद्यार्थी आणि पालकांसह पालिका कार्यालयावर निषेध मोर्चा काढला जाईल, असा इशारा नार्वेकर यांनी महापालिका प्रशासनाला दिला आहे.
कुलाबा येथील एन. ए. सावंत मार्गावरील पालिकेमार्फत चालवल्या जाणाऱ्या शाळेतील १,५०० विद्यार्थी शाळा बंद झाल्याने ऑनलाइन शिक्षण घेत आहेत. शाळा बंद करताना विद्यार्थ्यांना पर्यायी जागा करून देणे आवश्यक होते. मात्र तसे न करता ऑनलाइन शिक्षण देण्याचा पर्याय निवडला. याबाबत नार्वेकर यांनी महापालिका आयुक्त भूषण गगराणी यांनाही पत्र लिहून पर्यायी व्यवस्था करण्यासाठी तातडीने बैठक बोलावण्याची मागणी केली आहे. तसेच राज्य बाल हक्क आयोगाकडे याबाबत मागील आठवड्यात तक्रारही केली असल्याचे त्यांनी सांगितले.
..........
इमारती खरंच धोकादायक आहेत का?
शाळेची इमारत जीर्ण झालेली नसून दोन वर्षांपूर्वी तिची दुरुस्ती करण्यात आली होती. त्यामुळे इमारती खरच धोकादायक झाल्या आहेत का, असा प्रश्न नार्वेकर यांनी उपस्थित केला. स्मार्टफोनचा अभाव, खराब नेटवर्क आणि अरुंद घरांमुळे अनेकांनी शाळा सोडली आहे. अशा परिस्थितीत आर्थिकदृष्ट्या कमकुवत पार्श्वभूमीतील मुले अभ्यासावर लक्ष केंद्रित करू शकणार नाहीत.
- मकरंद नार्वेकर, माजी नगरसेवक, भाजप.
............
फोनचा गैरवापर हाेणार
ऑनलाइन वर्गांमधील समस्या मांडताना काही पालकांनी सांगितले, की जर एकाच शाळेत दोन मुले असतील तर आम्हाला दोन फोनची आवश्यकता असणार आहे का? जर मुले अभ्यासासाठी दिलेल्या फोनचा गैरवापर करीत असतील तर त्यांच्याकडे दिवसभर लक्ष ठेवून त्यांची काळजी घ्यावी लागणार आहे. अशा वेळेस काम कधी करायचे? सरकार मुलांना या इमारतीपेक्षाही जीर्ण झालेल्या जीटी शाळेत हलवत आहे. तीदेखील लवकरच बंद होईल, असे पालकांचे म्हणणे आहे.