डॉ. पायल तडवी आत्महत्या प्रकरण

डॉ. पायल तडवी प्रकरण 
---
वकील प्रदीप घरत यांना का हटवले?
उच्च न्यायालयाची नाराजी; भूमिका स्पष्ट करण्याचे आदेश
सकाळ वृत्तसेवा
मुंबई, ता. ११ ः डॉ. पायल तडवी आत्महत्येशी संबंधित खटल्यातून वकील प्रदीप घरत यांना हटवल्यावरून उच्च न्यायालयाने सोमवारी (ता. ११) नाराजी व्यक्त केली. तसेच घरत हे या खटल्यात पुन्हा विशेष सरकारी वकील म्हणून काम करणार आहेत का, अशी विचारणा उच्च न्यायालयाने सरकारकडे बुधवारपर्यंत भूमिका स्पष्ट करण्याचे आदेश दिले.
डॉ. पायल यांना आत्महत्येस प्रवृत्त केल्याप्रकरणी डॉ. भक्ती मेहरे, डॉ. अंकिता खंडेलवाल आणि डॉ. हेमा अहुजाविरोधात विशेष न्यायालयात प्रकरण न्यायप्रविष्ट आहे. प्रकरणाच्या सुरुवातीपासून घरत हे विशेष सरकारी वकील म्हणून काम पाहत होते; परंतु काही महिन्यांपूर्वी राज्य सरकारने त्यांना खटल्यातून काढले. डॉ. तडवी यांच्या आई आबेदा यांनी वकील लारा जेसानी यांच्यातर्फे उच्च न्यायालयात धाव घेऊन सरकारच्या निर्णयाला आव्हान दिले. तसेच घरत यांची खटल्यात पुन्हा सरकारी वकील म्हणून नियुक्ती करण्याची मागणी केली. या याचिकेवर न्या. रवींद्र घुगे आणि न्या. गौतम अनखड यांच्या खंडपीठापुढे सुनावणी झाली. त्यावेळी न्यायालयाने खटल्याच्या हाताळणीबद्दल चिंता व्यक्त केली. अशावेळी सरकारी वकिलांची खऱ्या अर्थाने परीक्षा असल्याचे नमूद करताना न्यायालयाने घरत यांच्या उचलबांगडीवरून प्रश्न उपस्थित केले.