ठाकरे गटाची भ्रष्टमंत्र्यांविरोधात तीव्र निदर्शने

भिवंडी, ता. १२ (वार्ताहर) : राज्यातील सत्तारूढ युती सरकारमधील संजय शिरसाठ, योगेश कदम, माणिकराव कोकाटे आणि गिरीश महाजन या भ्रष्टमंत्र्यांना मुख्यमंत्री देवेंद्र फडणवीस पाठीशी घालत आहेत. पक्षाने त्यांच्या मंत्रिमंडळातून तत्काळ हकालपट्टी करा, अशी मागणी शिवसेना ठाकरे गटाने केली. या पार्श्वभूमीवर राज्यभर निदर्शने होत असून, भिवंडीतही जोरदार आंदोलन करण्यात आले.
स्व. आनंद दिघे चौकात झालेल्या या आंदोलनाचे नेतृत्व पक्षाचे उपनेते विश्वास थळे, ज्योती ठाकरे, सहसंपर्क प्रमुख सोन्या पाटील, जिल्हाप्रमुख कुंदन पाटील, मनोज गगे, शहरप्रमुख प्रसाद पाटील आणि तालुकाप्रमुख करसन ठाकरे यांनी केले. या निदर्शनात जिल्हा महिला संघटिका वैशाली मेस्त्री, जिल्हा सचिव जय भगत, राजा पुण्यार्थी, महानगरप्रमुख अरुण पाटील, विधानसभा संघटक महादेव घाटाळ, तालुका महिलाप्रमुख फशी पाटील, उपजिल्हाप्रमुख प्रकाश भोईर, इरफान भुरे, युवासेना जिल्हा संघटक पंकज घरत यांच्यासह मोठ्या संख्येने शिवसैनिक आणि महिला रणरागिणी सहभागी झाल्या होत्या. यावेळी ‘बारच्या सावलीत बसले कोण?’, ‘काळ्या धंद्याचे पुढारी दोन’, ‘काखेत रुमाल, चेहरा भोळा-बुवाबाजी मंत्र्यांना करू ओम फट स्वाहा’, ‘बाजार उठलाय घोटाळ्यांचा, खुर्चीवरून उठवा भ्रष्टाचाऱ्यांना’, ‘घरात बॅग पैशांची, सत्ता पन्नास खोक्यांची’ अशा घोषणांनी परिसर दणाणून गेला. महिला पदाधिकाऱ्यांनी भ्रष्ट मंत्र्यांच्या बॅनरला जोडे मारून आपला संताप व्यक्त केला.