गोपाळकाला, गणेशोत्सवासाठी बाजारपेठ सज्ज

गोपाळकाला, गणेशोत्सवासाठी बाजारपेठ सज्ज
आगामी सणांच्या पार्श्वभूमीवर व्‍यावसायिकांचा उत्साह
अलिबाग, ता. १२ (वार्ताहर) : पुढील चार दिवसांत येणारा गोपाळकाला आणि त्यानंतर सर्वांचा लाडका गणेशोत्सव साजरा होणार असल्याने नागरिकांमध्ये उत्साहाचे वातावरण आहे. या सणांसाठी लागणारे साहित्य, फळे, मिठाई, फुले या सगळ्यांनी बाजारपेठ सजली आहे.
रायगड जिल्ह्यातील बाजारपेठांमध्ये सध्या उत्सवाचे वातावरण आहे. या आठवड्यात शनिवारी (ता.१६) गोपाळकाला साजरा होणार आहे. यानिमित्ताने जिल्ह्यात अगदी लाखो रकमेच्या दहीहंड्या फुटणार आहेत. यासाठी अलिबागमधील वरसोलीच्या कुंभार आळीत मातीच्या मडक्यांना मागणी वाढली आहे. त्याचप्रमाणे या दिवशी काकडीची खरेदी करतात. त्यामुळे बाजारात मोठ्या प्रमाणात काकडी दाखल झाली आहे. अनेक राजकीय पक्षांनी मोठ्या बक्षिसांच्या दहीहंडी स्पर्धांचे आयोजन केले आहे. या स्पर्धांच्या वेळी स्पर्धकांना आयोजकांतर्फे टी- शर्ट देण्यात येतात. त्यामुळे असे टी-शर्ट विक्री करणाऱ्याचा उद्योगही तेजीत आला आहे. यासोबतच बाजारात विविध प्रकारची फळे विक्रिसाठी दाखल झाली आहेत. यामध्ये केळी, डाळिंब, पेरू, संत्री, ड्रॅगन फ्रूट अशा प्रकारच्या फळांचा समावेश आहे.
..................
चौकट :
बाजारपेठेत अनेक सवलती
गणेशमूर्ती, सजावटीचे साहित्य, पूजेचे साहित्य, फळे, फुले, मिठाई आणि इतर आवश्यक वस्तू खरेदी करण्यासाठी लोक बाजारपेठांमध्ये येत आहेत. अलिबागमध्ये अनेक ठिकाणी गणेशमूर्ती, सजावटीचे साहित्य, फुलांच्या माळा, पर्यावरणपूरक मखर विक्रीसाठी उपलब्ध झाले आहेत. उत्सवाच्या काळात, अनेक दुकानांमध्ये सवलतीदेखील मिळत असल्याने, खरेदीसाठी लोकांचा उत्साह वाढला आहे.