१० गावांमध्ये संतापाची लाट

रोहा, ता. १२ (बातमीदार)ः तालुक्यातील ११९ गावांचा पर्यावरण संवेदनशील क्षेत्रात समावेश करण्यात आला आहे. या निर्णयामुळे चिल्हे, देवकान्हे, खांब भागातील शेतकऱ्यांनी प्रशासनाला निवेदनद्वारे विरोध दर्शवला आहे, तर आणखी १० गावांतील संतप्त ग्रामस्थांनी संघटित होताना प्रशासनाविरोधात एल्गार पुकारला आहे.
पर्यावरण संवेदनशील क्षेत्राला विरोध असल्याचे लेखी निवेदन मंगळवारी (ता. १२) धामणसई विभागातील १० गावांतील ग्रामस्थांनी रोहा प्रांताधिकारी, वन उपविभागीय अधिकारी तसेच तहसीलदारांकडे निवेदनातून दिले आहे. पर्यावरण संवेदनशील क्षेत्राविरोधाच्या आंदोलनात पिंगळसई, वांदोली, मढाळी, सोनगाव, गावठाण, धामणसई, मालसई, मूठवली, सांगडे, उडदवणे गावातही संतापाची लाट आहे.