बेशिस्त वाहतुकीकडे डोळेझाक

कामोठे, ता. १२ (बातमीदार) : कामोठे शहरातील वाहतूक कोंडीची समस्या बिकट झाली आहे. नागरिकांना वाहतूक कोंडीचा त्रास सहन करावा लागत आहे. शहरातील जड, अवजड वाहनांच्या संख्येत वाढ झाली आहे. गृहनिर्माण संस्था, दुकाने, विविध आस्थापना यांच्या आवारात वाहने उभी करण्यासाठी पर्याप्त जागा नसल्याने रस्त्याच्या दुतर्फा वाहने उभी केली जात आहेत. पण वाहनचालकांच्या या बेशिस्त वर्तनाकडे वाहतूक पोलिसांकडून कारवाईऐवजी दुर्लक्षच केले जात आहे.
सायन-पनवेल महामार्गावरून कामोठे शहरात प्रवेश करताना वाहनचालकांना वाहतूक कोंडीला तोंड द्यावे लागत आहे. शहराच्या प्रवेशद्वारावरील रिक्षा थांब्यावरून सकाळी आणि संध्याकाळी मानसरोवर रेल्वेस्थानकाच्या दिशेने, शहरात, परिसरात हजारोंच्या संख्येने प्रवासी वाहतूक केली जाते. या रिक्षांच्या वर्दळीमुळे गर्दीच्या वेळी शहरात प्रवेश करताना वाहनचालकांना अडथळा होत आहे. रिक्षा थांब्याच्या हॉटेल आणि फास्टफूड दुकानातील ग्राहकांची वाहने रस्त्याकडेला उभी केली जात असल्याने कोंडीला आमंत्रण दिले जात आहे. सायंकाळी सहा ते रात्री आठ वाजेपर्यंत या मार्गावर पोलिस ठाण्यापर्यंत वाहनांच्या लांबच लांब रांगा लागतात.
---------------------------------------
तारेवरची कसरत
खांदा वसाहतीच्या दिशेने कामोठे शहरात येणाऱ्या रस्त्यावर खड्डे पडले आहेत. यामुळे वाहनचालकांना त्रास सहन करावा लागत आहे. शहरातील ज्येष्ठ नागरिक, गरोदर महिलांना रस्ता ओलांडताना तारेवरची कसरत करावी लागत आहे. वाहतूक पोलिसांनी आवश्यक उपाययोजना करून नागरिकांना दिलासा दिला पाहिजे, यासाठी फोरमच्या माध्यमातून प्रयत्न सुरू असल्याचे कामोठे कॉलनी फोरमचे अध्यक्ष मंगेश अढाव यांनी सांगितले.