पनवेलचे प्रगतशील शेतकरी मिनेश गाडगीळ यांना ‘वसंतराव नाईक कृषी गौरव पुरस्कार’;

मिनेश गाडगीळ यांना वसंतराव नाईक कृषी गौरव पुरस्कार
नाविन्यपूर्ण तांदूळ उत्पादन व संशोधनाची दखल
पनवेल, ता. १२ (बातमीदार) ः पनवेल तालुक्यातील गुळसुंदे गावचे प्रगतशील शेतकरी मिनेश गाडगीळ यांची वसंतराव नाईक कृषी गौरव पुरस्कार २०२५ साठी निवड झाली आहे. त्यांच्या नाविन्यपूर्ण रंगीत तांदळाचे उत्पादन व कृषी संशोधनाची दखल घेत ही राज्यस्तरीय निवड करण्यात आली आहे. हा पुरस्कार माजी मुख्यमंत्री स्व. वसंतराव नाईक यांच्या ४६व्या स्मृतिदिनानिमित्त पुसद येथील बाबासाहेब नाईक अभियांत्रिकी महाविद्यालयात सोमवारी (ता.१८) कार्यक्रमात दिला जाणार आहे. या कार्यक्रमाच्या अध्यक्षस्थानी मुख्यमंत्री देवेंद्र फडणवीस असून कृषीमंत्री दत्तात्रेय भरणे आणि राज्यमंत्री इंद्रनील नाईक यांची या कार्यक्रमात प्रमुख उपस्थिती राहणार आहे.
वसंतराव नाईक प्रतिष्ठानतर्फे या पुरस्कारांसाठी राज्यभरातून १३ शेतकरी व कृषिशास्त्रज्ञांची निवड झाली आहे. कोकण विभागातून पनवेल तालुक्यातील गुळसुंदे गावचे मिनेश गाडगीळ यांचा समावेश आहे. त्यांनी आपल्या शेतात विविध रंगीबेरंगी व पोषणमूल्यांनी भरलेले तांदूळ आणि हवामानाशी विसंगत असलेल्या परदेशी फळपिकांचे यशस्वी उत्पादन घेतले आहे. विशेष म्हणजे, मधुमेहींसाठी उपयुक्त आरएनआर तेलंगणा सोना, अँटीऑक्सिडंट व अँटीकॅन्सर गुणधर्म असलेला ब्ल्यु राईस आणि पर्पल राईस या दुर्मिळ प्रजाती रायगड जिल्ह्यात प्रथमच घेतल्या गेल्या आहेत. त्यांच्या नाविन्यपूर्ण संशोधनात धान्यांच्या टरफल्यांपासून फॅटी अ‍ॅसिड आणि अल्कोहोल निर्मितीच्या प्रक्रियेला भारत सरकारचे पेटंट (पेटंट क्रमांक २४४९०२) प्राप्त झाले आहे. या योगदानाबद्दल शासनाने यापूर्वी त्यांना महाराष्ट्र कृषीभूषण पुरस्काराने सन्मानित केले आहे.