शेतकऱ्यांनी फॉर्मर आयडी न काढल्यास शासकीय योजनांचा लाभ मिळणार नाही.

शेतकऱ्यांसाठी आयडी बंधनकारक
अन्यथा योजनांचा लाभ मिळणार नाहीः तहसीलदारांचे आवाहन
कर्जत, ता. १२ (बातमीदार) ः शेतकऱ्यांना शासनाच्या विविध योजनांचा लाभ मिळवण्यासाठी फार्मर आयडी तयार करणे अनिवार्य केले आहे. कर्जत तालुक्यातील ज्या व्यक्तींच्या नावावर ७/१२ उतारा आहे, अशा सर्व शेतकऱ्यांनी आपला फार्मर आयडी तयार करावा. यासाठी तालुक्यातील जवळच्या महा ई-सेवा केंद्राशी संपर्क साधण्याचे आवाहन महसूल प्रशासनाने केले आहे.
फार्मर आयडी तयार नसल्यास प्रधानमंत्री किसान सन्मान निधी योजना, नामे शेतकरी योजना, पिक विमा योजना, खत व बियाणे अनुदान, धान खरेदी, वीज बिल सवलत अशा अनेक योजनांचा लाभ मिळणार नाही. त्यामुळे शेतकऱ्यांनी विलंब न करता लवकरात लवकर आपला आयडी तयार करावा, असे आवाहन प्रशासनाने केले आहे. यासंदर्भात धनंजय जाधव, तहसीलदार कर्जत-रायगड यांनीही शेतकऱ्यांना वेळेत ही प्रक्रिया पूर्ण करण्याचे निर्देश दिले आहेत.