दहीहंडी उत्सवात सिनेतारकांचे आकर्षण

दहीहंडी उत्सवात सिनेतारकांचे आकर्षण
पनवेलमध्ये जय्यत तयारी, मराठी कलाकार निमंत्रित
पनवेल, ता. १२ (बातमीदार)ः पनवेल परिसरातील दहीहंड्या फोडण्यासाठी ठाणे-मुंबईतील गोविंदा पथके येणार असल्याने या उत्सवाची आबालवृद्धांना प्रतीक्षा लागली आहे. पनवेल, नवीन पनवेल, कळंबोली, खारघर परिसरातील विविध मंडळे, प्रतिष्ठाने दहीहंडी उत्सवाच्या तयारीला लागले असून, सिने-तारकांची हजेरीने सोहळा रंगणार आहे.
हिंदी-मराठी चित्रपटसृष्टीतील सिनेस्टार, समाजमाध्यमातील रील स्टार, राष्ट्रीय खेळाडू आमंत्रित केले जाते. कळंबोली रोडपाली या ठिकाणी आमदार विक्रांत पाटील प्रतिष्ठानच्या दहीहंडी उत्सवात मराठीच्या आघाडीच्या तारका हजेरी लावतात. त्यामुळे पनवेल परिसरात या दहीहंडीची स्वतंत्र ओळख निर्माण झाली आहे. यंदा विक्रांत पाटील फाउंडेशनने सात लाख ७७ हजार ७७७ रुपयांचे बक्षीस ठेवले आहे. नवीन पनवेल येथील तेजस कांडपिळे यांच्या मंडळाद्वारे साजऱ्या होणाऱ्या दहीहंडी उत्सवात यंदा आघाडीचा मराठी सिने अभिनेता श्रेयस तळपदे हजेरी लावणार आहे. या मंडळाने सात लाख ७७ हजार ७७७ रुपयांचे बक्षीस ठेवले आहे, तर महिलांसाठी ५५ हजार ५५५ रुपयांचे विशेष बक्षीस ठेवण्यात आले आहे. आमदार प्रशांत ठाकूर यांच्या मार्गदर्शनाखाली अमर ठाकूर यांच्या स्वर्गीय त्रिंबक जोमा ठाकूर सामाजिक संस्था रोडपाली कळंबोली मंडळाने सिनेतारका अमृता खानविलकर यांना प्रमुख पाहुणे म्हणून आमंत्रित केले असून, या मंडळाने पाच लाख ५५ हजार ५५५ रुपयांचे एकत्रित बक्षीस ठेवले आहे.
---------------------
पोलिसांकडून खबरदारी
दहीहंडी उत्सवानिमित्त काही गोविंदा ट्रकच्या टपावर, तर काही जण टेम्पोच्या फाळक्यावर बसून प्रवास करतात. काही गोविंदा दुचाकीवर फिरताना वाहतुकीचे नियम धाब्यावर बसवल्याचे दिसून येते. त्यामुळे वाहतूक पोलिसांकडून उत्सव काळात विशेष खबरदारी घेतली जाणार आहे.