मालमत्ता करमाफीसाठी माजी सैनिकाचे उपोषण

पालघर, ता. १२ (बातमीदार) : नगर परिषद प्रशासनाकडून माजी सैनिकांना मालमत्ता कर माफ केला जात नाही, म्हणून पालघरमधील माजी सैनिक डॉ. भाऊराव तायडे उद्या (ता. १३)पासून हुतात्मा चौकाजवळ बेमुदत उपोषणाला बसणार आहेत.

कारगील युद्धात सहभागी झालेले डॉ. तायडे १९ वर्षांच्या सेवानिवृत्तीनंतर पालघर पूर्व परिसरात वास्तव्याला आहेत. त्यांची मालमत्ता करमाफीला पात्र असून, २०११ पासून वारंवार पत्रव्यवहार करूनही नगर परिषदेने त्यांचे प्रकरण निकाली काढले नसल्याचा दावा त्यांनी केला आहे. या मालमत्तेची नोंद दप्तरातून गहाळ केल्याचा गंभीर दावाही त्यांनी केला आहेत, शिवाय घोलविरा वेऊर येथे त्यांच्या नावावर चुकीच्या दोन मालमत्ता नोंदी दाखवून त्यातील एक रद्द केल्याचेही त्यांनी सांगितले. मालमत्ता जप्तीची नोटीस व दोन लाख ६३ हजार रुपये मालमत्ता कराची मागणी केली जात आहे.