कलोते धरणात बुडून हॉटेल कर्मचाऱ्याचा मृत्यू

कलोते धरणात बुडून हॉटेल कर्मचाऱ्याचा मृत्यू
खालापूर, ता. १२ (बातमीदार) : रायगडमधील खालापूरजवळच्या कलोते धरणात बुडून एका हॉटेल कर्मचाऱ्याचा मृत्यू झाला आहे. अभय शिवाजी राऊत (वय २३) असे या तरुणाचे नाव असून, तो मूळचा बीडचा होता. मंगळवारी (ता. १२) सकाळी साडेसात वाजता तो पोहण्यासाठी धरणात उतरला होता.
अभयने अंगात शर्ट आणि जीन्स घातल्यामुळे त्याला पोहताना दम लागला आणि तो पाण्यात बुडाला. घटनेची माहिती मिळताच खालापूर पोलिसांनी हेल्प फाउंडेशन खोपोलीच्या मदतीने शोधमोहीम सुरू केली. चार तासांच्या अथक प्रयत्नांनंतर स्कुबा डायव्हिंगच्या सहाय्याने त्याचा मृतदेह बाहेर काढण्यात आला. या घटनेमुळे परिसरात हळहळ व्यक्त केली जात आहे.