ऐरोली-दिघामध्ये रासायनिक प्रदूषण

ऐरोली-दिघ्यामध्ये रासायनिक प्रदूषण
नागरिकांना त्रास; नाल्यात रसायन सोडणाऱ्या दोन टँकरवर कारवाई
तुर्भे, ता. १२ (बातमीदार) ः ऐरोली-दिघा परिसरात रासायनिक प्रदूषण होत असल्याने नागरिक त्रस्‍त झाले आहेत. अंधाराचा फायदा घेत प्रक्रिया न करता नाल्यात थेट रसायन सोडले जाते. नुकतेच दोन टँकरवर नवी मुंबई महापालिकेचे प्रदूषण नियंत्रण मंडळ आणि पोलिसांनी संयुक्त कारवाई करून जप्तीची कार्यवाही केली.
टीटीसी औद्योगिक वसाहतीत अनेक रासायनिक उत्पादक कारखाने आहेत. नियमांनुसार प्रक्रिया करूनच रसायन नाल्यात सोडणे गरजेचे असते, मात्र अनेक कारखानदार रात्रीच्या वेळी थेट रसायन सोडतात. त्यामुळे उग्र वास पसरून नागरिकांना आरोग्यविषयक त्रास होत आहे. काही दिवसांपूर्वी ऐरोलीतील ग्रीन वर्ल्ड सीएचएस, नेवा भक्ती पार्क, न्यू गार्डन सीएचएस इत्यादी भागांत रोज सायंकाळी उग्र वासाने नागरिक हैराण झाले होते.
पंधरा-वीस दिवसांपासून नागरिक आणि मनसेकडून तक्रारी वाढल्या होत्या. सोमवारी रात्री दीड वाजता दिघा परिसरातील मुकुंद कंपनीजवळील नाल्यात दोन टँकरमधून सुमारे १२ हजार लिटर रासायनिक द्रव सोडताना पथकाने रंगेहाथ पकडले. पथक पाहून चालक पळून गेले. ग्रीन वर्ल्डच्या रहिवाशांच्या उपस्थितीत ही कारवाई झाली. याप्रकरणी रबाळे एमआयडीसी पोलिसांकडे टँकरमालक आणि जमीनधारकाविरोधात तक्रार दाखल करण्यात आली असून, दोन्ही टँकर जप्त करण्यात आले आहेत. स्थानिक रहिवासी रामेश्वर गुड्डा यांनी कारवाईचे स्वागत करीत सातत्यपूर्ण पावले उचलल्यास दिलासा मिळेल, असे मत व्यक्त केले. तर मनसेचे उप शहर अध्यक्ष नीलेश बाणखिले यांनी रसायनांचे नमुने तपासून संबंधित कारखान्यांवर कठोर कारवाई न केल्यास तीव्र आंदोलन उभारले जाईल, असा इशारा दिला.
...............
ज्येष्ठ नागरिकांसह लहान मुलांना त्रास
मागील काही दिवसांत ऐरोली, दिघा परिसरात रात्रीच्या वेळी रासायनिक वायू तसेच नाल्यात सोडले जाणारे विषारी द्रव्य यामुळे परिसरात उग्र दर्प पसरला होता. यामुळे घशात खवखव, डोळ्यांची जळजळ, डोकेदुखी, खाज यांसारखे त्रास होत होते. विशेषतः ज्येष्ठ नागरिक आणि लहान मुलांवर याचा अधिक परिणाम जाणवत होता.