ऐरोली सेक्टर-४ मध्ये विजेचा लपंडाव

ऐरोली सेक्टर-४ मध्ये विजेचा लपंडाव
वाशी, ता. १२ (बातमीदार) ः ऐरोली सेक्टर-४ येथे वारंवार होणाऱ्या खंडित वीजपुरवठ्यामुळे स्थानिक नागरिक त्रस्त झाले आहेत. या समस्येच्या निराकरणासाठी सर्व असोसिएशनचे पदाधिकारी, माजी नगरसेविका हेमांगी सोनावणे आणि अंकुश सोनावणे यांच्या नेतृत्वाखाली मंगळवारी (ता. १२) महावितरण अधिकाऱ्यांना भेट देऊन निवेदन देण्यात आले. समस्येवर तत्काळ उपाययोजना न झाल्यास थेट जनआंदोलन छेडण्याचा इशारा यावेळी देण्यात आला.
ऐरोली सेक्टर-४ मधील विजेचा लपंडाव हा गेल्या काही महिन्यांपासूनचा कायमस्वरूपी मुद्दा बनला आहे. दिवसातून अनेक वेळा अचानक वीज जाणे, लो- व्होल्टेज, तसेच विना-पूर्वसूचना वीज खंडित होत असल्याने नागरिकांच्या दैनंदिन कामांवर परिणाम होत आहे. या संदर्भात महावितरणकडे अनेक वेळा लेखी तक्रारी केल्या असूनही स्थितीत लक्षणीय सुधारणा झालेली नाही, असा आरोप नागरिकांनी केला. आगामी दिवसांत गणेशोत्सव व इतर सणांच्या पार्श्वभूमीवर वीजपुरवठा खंडित झाल्यास नागरिकांचा असंतोष उफाळून येऊ शकतो, अशी भीती व्यक्त करण्यात आली. विशेषतः सणासुदीच्या काळात विजेची अनुपलब्धता ही केवळ असुविधाच नाही, तर सुरक्षेच्या दृष्टीनेही धोकादायक ठरू शकते, असे माजी नगरसेविका हेमांगी पाटील (सोनावणे) यांनी सांगितले. निवेदन देताना पदाधिकाऱ्यांनी, समस्येचे तातडीने निराकरण झाले नाही, तर मोठ्या प्रमाणावर नागरिक रस्त्यावर उतरून आंदोलन करतील, असा इशारा दिला. महावितरणच्या अधिकाऱ्यांनी तांत्रिक अडचणी दूर करण्यासाठी आवश्यक पावले उचलली जातील, असे आश्वासन दिल्याचे सांगण्यात आले.