बेस्ट बसच्या अपघाता

‘बेस्ट’खाली चिरडून
महिलेचा मृत्यू
सकाळ वृत्तसेवा
मुंबई, ता. १२ ः मलबार हिल येथील सह्याद्री अतिथीगृहासमोर बेस्ट ई-बस आणि कारदरम्यान चिरडल्याने एका वृद्ध महिलेचा मृत्यू झाला. नीता शहा (वय ७५) असे मृत महिलेचे नाव आहे.
नीता शहा नेहमीप्रमाणे मॉर्निंग वॉकसाठी निघाल्या होत्या. सकाळी ९.१० वाजता बस मार्ग क्रमांक १०५ ही बस विजय वल्लभ चौकातून कमला नेहरू पार्ककडे जात होती.  सह्याद्री अतिथीगृहाच्या समोर बस येताच बस अचानक एका कारला घासली गेली आणि मोठा आवाज आला. चालकाने बसमधून उतरून बघितले असता, एक महिला बसच्या डावीकडील मागच्या चाकाखाली आली होती. तिच्या डोक्याला गंभीर दुखापत झाल्याने घटनास्थळी उपस्थित पोलिसांनी तिला ताबडतोब जे. जे. रुग्णालयात दाखल केले; मात्र डॉ. स्नेहल जाधव यांनी त्यांना मृत घोषित केले. या अपघातप्रकरणी बेस्टचे अधिकारी अधिक तपास करीत आहेत. तसेच मुंबई पोलिसांची फॉरेन्सिक टीमही या वेळी घटनास्थळी दाखल झाली होती.