नागरी सुविधा केंद्राच्या भिंतीचे प्लॅस्टर पोकळ

उल्हासनगर, ता. १२ (बातमीदार) : महापालिकेच्या नागरी सुविधा केंद्राच्या भिंतीचे प्लॅस्टर पोकळ झाले आहे. हे प्लॅस्टर कोसळण्याची भीती व्यक्त केली जात आहे. तसे झाल्यास भिंतीला लागून उभ्या असलेल्या दुचाकींचे नुकसान होण्याची शक्यता नाकारता येत नाही.
उल्हासनगर महापालिका इमारत ही १९७६ मध्ये बांधली होती. प्रवेशद्वारासमोरच नागरी सुविधा केंद्र आहे. त्याच्या उजव्या बाजूच्या भिंतीचे प्लॅस्टर पोकळ झालेले आहे. तेथेच दुचाक्या उभ्या असतात. कामकाजाच्या वेळेत हे प्लॅस्टर कोसळल्यास दुचाकींचे नुकसान होऊ शकते. इमारत ४९ वर्षांची झालेली असल्याने धोकादायक वळणावर आहे. यासाठी ती निष्काशित करून नवी इमारत उभारण्यात येणार आहे. येत्या काळात इमारतीमधील कार्यालये पवई चौकात उभारलेल्या शासकीय इमारतीत स्थलांतरित करण्याची प्रक्रिया हाताळली जाणार आहे. नुकत्याच पार पडलेल्या १०० दिवसांच्या कृती आराखड्यात उल्हासनगर महापालिका राज्यात प्रथम आली आहे. आयुक्त मनीषा आव्हाळे यांना सर्वोत्तम आयुक्तांचा मान मिळालेला आहे. त्यांनी पालिकेचा अंतर्गत भाग लक्षवेधक केला असला, तरी बाह्यभाग आणि गंजलेल्या अवस्थेतील जुने प्रवेशद्वार यांची दुरवस्था आहे. बाह्यभागांची दुरुस्ती आणि प्रवेशद्वार नव्याने लावण्याची मागणी अभ्यागतांकडून केली जात आहे.