महानिर्मितीच्या १७० मेगावॉटच्या सौर प्रकल्पातून महिनाअखेर वीजनिर्मिती

महिनाअखेर सौर ऊर्जा प्रकल्पातून १७० मेगावॉट वीजनिर्मिती
महावितरणद्वारे कृषीपंपाला वीजपुरवठा
सकाळ वृत्तसेवा
मुंबई, ता. १२ : महानिर्मितीने मुख्यमंत्री सौर कृषी वाहिनी योजनेंतर्गत उभारलेल्या १७० मेगावाॅट क्षमतेच्या विकेंद्रित सौर प्रकल्पातून महिनाअखेर वीजनिर्मिती सुरू होणार आहे. त्यामध्ये छत्रपती संभाजीनगर जिल्ह्यातील १३, तर अहिल्यानगर जिल्ह्यातील १० प्रकल्पांचा समावेश आहे. त्यांची कामे अंतिम टप्प्यात असून, या प्रकल्पात तयार होणारी वीज महावितरणच्या माध्यमातून थेट शेतकऱ्यांच्या कृषिपंपाला पुरवली जाणार आहे.
शेतकऱ्यांना दिवसा वीज उपलब्ध व्हावी म्हणून राज्य सरकारकडून मुख्यमंत्री सौर कृषी वाहिनी योजनेंतर्गत २ ते १० मेगावाॅट क्षमतेचे विकेंद्रित वीज प्रकल्प उभारले जात आहेत. त्यानुसार महानिर्मितीकडून अहिल्यानगर जिल्ह्यात ३१ ठिकाणी तसेच छत्रपती संभाजीनगर जिल्ह्यात १० ठिकाणी सौर ऊर्जा प्रकल्प नियोजित आहेत. सध्या अहिल्यानगर जिल्ह्यातील पारगाव १५ मेगावाॅट, पारनेर १३ मेगावाॅट, भाळवणी १५ मेगावाॅट, शेवगाव अर्बन १२ मेगावाॅट, मिडसांगवी नऊ मेगावाॅट, तर छत्रपती संभाजीनगर जिल्ह्यातील महालगाव १५ मेगावाॅट, बेलवंडी मेगावाॅट, चिंभळे १५ मेगावाॅट, विसपूर १५ मेगावाॅट, तीसगांव १३ मेगावाॅट, चापडगाव १९ मेगावाॅट आणि शहरटाकळी १५ मेगावाॅट या प्रकल्पांची कामे वेगात सुरू आहेत. महिनाअखेरपर्यंत हे प्रकल्प कार्यान्वित केले जाणार आहेत. त्या पार्श्वभूमीवर महानिर्मितीचे अध्यक्ष व व्यवस्थापकीय संचालक राधाकृष्णन बी. यांनी नुकतीच भेट देऊन प्रकल्पांची पाहणी केली.