दंडात ९० टक्के सवलत १५ ऑगस्टला संपणार

दंडात ९० टक्के सवलत १५ ऑगस्टला संपणार

पनवेल महापालिका अभय योजना

सकाळ वृत्तसेवा
नवी मुंबई, ता. १२ ः पनवेल महापालिकेने लागू केलेल्या अभय योजनेनुसार दंडाच्या रकमेवर ९० टक्के सूट ही सवलत १५ ऑगस्टला रात्री १२ वाजता संपणार आहे. त्यामुळे जास्तीत जास्त नागरिकांनी या सवलतीचा लाभ मिळवण्यासाठी मालमत्ता कराचा भरणा करावा, असे आवाहन महापालिकेच्या मालमत्ता कर विभागातर्फे करण्यात येत आहे.
पनवेल महापालिकेच्या मालमत्ता कर विभागाने दिलेल्या माहितीनुसार, महाराष्ट्र महानगरपालिका अधिनियम कलम १५० अ तसेच अनुसूची ड प्रकरण ८ कराधान नियम १५ (२) अन्वये पनवेल महापालिकेमार्फत पूर्वलक्षी प्रभावाने मागील सहा वर्षांपर्यंत मालमत्ता कर आकारणी करण्यात आलेली आहे. सिडकोने सिडको वसाहतीसाठी सेवा दिलेल्या असल्याने सेवा शुल्क वसूल करीत आहे. हे सेवा शुल्क सिडको जमिनीवर सरसकट आकारणी करीत आहे. मालमत्ता कर हा जमिनीवर उभ्या असलेल्या इमारतीवर (सदनिका, कार्यालय, दुकान व इमल्यावर) क्षेत्रफळ व बांधकाम प्रकारानुसार आकारत आहे. त्यामुळे सिडको सेवा शुल्क व महापालिकेचा मालमत्ता कर हा स्वतंत्र असून, त्याचे नियम व लागू करण्याची प्रणाली वेगवेगळी आहे. सर्वोच्च न्यायालय, दिल्ली व उच्च न्यायालय, मुंबई येथे मालमत्ता कराच्या संदर्भात विविध याचिका दाखल असून, त्यांची सुनावणी प्रक्रिया सुरू आहे. पनवेल महापालिकेने आकारणी केलेली दाराची टक्केवारी ही लगतच्या महापालिकांच्या मालमत्ता कारच्या दराच्या टक्केवारीपेक्षा कमी आहे. पूर्वाश्रमीच्या ग्रामपंचायतीसाठी ग्रामपंचायतमध्ये करआकारणी झालेली असल्यास अशा मालमत्तेस २०%, ४०%, ६०%, ८०% प्रमाणे सामान्य कर आकारून त्याच्या पुढील वर्षी महापालिकेच्या समतुल्य करआकारणी करण्यात आली आहे.