दादर येथील जैन मंदिराशेजारील इमारतीच्या छतावर अनधिकृत कबुतरखाना

दादरमध्ये इमारतीवर कबुतरांना दाणे
न्यायालयाच्या आदेशाचे पुन्हा उल्लंघन
सकाळ वृत्तसेवा
मुंबई, ता. १२ ः उच्च न्यायालयाने दादर येथील कबुतरखाना बंद करण्याचे आदेश दिला आहे. महापालिकेकडून त्याबाबतची अंमलबजावणी केली जात असली तरी काही लोकांकडून न्यायालयाच्या आदेशाचे सर्रास उल्लंघन केले जात आहे. दादरच्या जैन मंदिराशेजारील एका इमारतीच्या छतावर दाण्याची पोती टाकली जात आहेत. तेथे हजारो कबुतरे जमा होत असून, त्याचा परिसरातील नागरिकांना मोठ्या प्रमाणात त्रास सहन करावा लागत आहे.
उच्च न्यायालयाच्या निर्देशानंतर मुंबई महापालिकेने दादरच्या कबुतरखान्यावर कारवाई केली. काही दिवसांपूर्वी पालिकेने हा कबुतरखाना पोलिसांच्या सुरक्षेत चारही बाजूंनी ताडपत्री बांधून बंदिस्त केला. येथे कबुतरांना खाद्य घातल्यास कारवाई करण्याचा इशारा पालिकेने दिला. पालिकेच्या या कारवाईविरोधात जैन समुदायाने आक्रमक होत तीव्र विरोध केला. त्यानंतर झालेल्या सुनावणीत उच्च न्यायालयाने कबुतरखान्यावरील बंदी कायम ठेवली आहे. न्यायालयाच्या निर्देशानंतर सोमवारी पालिकेने कबुतरखाना पुन्हा बंदिस्त केला आहे. न्यायालयाच्या सुधारित आदेशाचे उल्लंघन करीत जैन मंदिराजवळील इमारतीच्या छतावर काही लोक अनधिकृतपणे कबुतरांना दाणे टाकत आहेत. कबुतरांमुळे आरोग्यविषयक समस्या निर्माण होत आहेत. तसेच न्यायालयीन आदेशाचे उघडपणे उल्लंघन होत असून, प्रशासनाने तत्काळ कारवाई करण्याची गरज असल्याची मागणी स्थानिक रहिवाशांनी केली आहे.
----
एकीकरण समितीला नोटीस
शहरात पोलिस आयुक्तांचे जमावबंदी आदेश लागू आहेत. त्याचे उल्लंघन करणारा मोर्चा काढू नये. या आदेशाचे उल्लंघन करून मोर्चा काढला आणि त्यातून अनुचित घटना किंवा कायदा-सुव्यवस्थेचा प्रश्न निर्माण झाला तर त्यास सर्वस्वी जबाबदार धरले जाईल, अशी सूचना देणारी नोटीस मंगळवारी दादर पोलिसांनी मराठी एकीकरण समितीच्या प्रमुख पदाधिकाऱ्यांना बजावली आहे.