घर वाचवण्यासाठी किशोर कदम यांचे आवाहन

घर वाचवण्यासाठी किशोर कदम यांचे आवाहन

मुंबई, ता. १२ ः प्रसिद्ध अभिनेते आणि कवी किशोर कदम ऊर्फ ‘सौमित्र’ यांनी सोमवारी (ता. ११) आपल्या राहत्या घराचे रक्षण करण्यासाठी समाजमाध्यमावरून आवाज उठवला आहे. त्यांनी याबाबत पोस्ट करीत सांगितले की, पुनर्विकासाच्या नावाखाली ते राहात असलेल्या इमारतीत एसआरए प्रकल्प राबविण्याचे प्रयत्न सुरू आहेत.
अंधेरी चकाला येथील चरतसिंग कॉलनी रोडवर मोक्याच्या ठिकाणी ‘हवा महल’ नावाची इमारत आहे, ज्यात सौमित्र यांचा फ्लॅट आहे. या इमारतीत २४ सभासद असून, पुनर्विकासाची चर्चा सध्या सुरू आहे, मात्र हा प्रकल्प एसआरए अंतर्गत राबवण्याची योजना आखण्यात आल्याचा आरोप त्यांनी केला. त्यांच्या म्हणण्यानुसार, प्रकल्प सल्लागार आणि विकसक यांच्या संगनमतातून, सोसायटी कमिटीच्या अज्ञानाचा फायदा घेत हा डाव रचला गेला आहे. बहुसंख्य सभासदांचा पाठिंबा मिळवून, प्रत्यक्षात लोक स्वतःच्या घराच्या अस्तित्वालाच धोका पोहोचवत आहेत. त्यांनी मुख्यमंत्री आणि उपमुख्यमंत्र्यांनी तातडीने हस्तक्षेप करावा, तसेच एका कलावंताचे घर वाचवण्यासाठी जनतेनेही साथ द्यावी, असे आवाहन आपल्या पोस्टमधून केले. या पोस्टनंतर किशोर कदम म्हणाले की, ही पोस्ट शेअर केल्यानंतर मला अनेकांकडून पाठिंबा मिळाला. मुख्यमंत्र्यांपासून, उपमुख्यमंत्री, अनेक मंत्र्यांनी, मित्रमंडळींनी आणि चाहत्यांनी दिलेल्या आधाराबद्दल मी मनापासून आभारी आहे.
...
मुख्यमंत्र्यांकडून प्रतिसाद
किशोर कदम यांच्या या पोस्टची दखल राज्याचे मुख्यमंत्री देवेंद्र फडणवीस यांनी घेतली. त्यांनी आपल्या प्रतिक्रियेत म्हटले की, आपली ही तक्रार मी सहकार सचिव प्रवीण दराडे आणि एसआरएचे मुख्य कार्यकारी अधिकारी महेंद्र कल्याणकर यांना सांगितली असून, त्यांना यात लक्ष घालण्यास सूचित केले आहे. आपल्याशी ते संपर्कात राहतील.