उरणमध्ये पोलिसांवर तिघा मद्यपींचा हल्ला; तिघे मद्यपी अटकेत

उरणमध्ये पोलिसांवर हल्ला करणाऱ्या तिघांना अटक
नवी मुंबई, ता. १२ (वार्ताहर) : उरण मधील नागाव स्मशानभूमी जवळ सार्वजनिक ठिकाणी मद्यपान करणाऱ्या मद्यपींना गस्तीवर असलेल्या पोलिसांनी घरी जाण्यास सांगितल्याने संतफ्त झालेल्या तिघा मद्यपींनी पोलिसांना शिवीगाळ व मारहाण करुन पलायन केल्याची घटना रविवारी (ता. १०) मध्यरात्री घडली. निशांत शिंदे (वय २३), विशाल शिंदे (वय २३) व राजेश कोळी (वय २६) अशी या तिघा मद्यपींची नावे आहेत. या तिघांनाही सोमवारी (ता. ११) दुपारी अटक करण्यात आली असून, त्यांच्यावर सरकारी कामात अडथळा आणल्याचा गुन्हा दाखल करण्यात आला आहे.
नागाव स्मशानभूमीजवळच्या खडकावर आरोपी निशांत, विशाल व राजेश हे तिघेही मद्यपान करत बसले होते. त्यामुळे गस्तीवर असलेल्या पोलिसांनी त्यांना सार्वजनिक ठिकाणी मद्यपान न करण्याबाबत तसेच घरी जाण्याबाबत त्यांना समज दिली. त्यामुळे संतापलेल्या तरुणांनी पोलिसांना शिवीगाळ केली, एका हवालदाराचा मोबाईल फेकून दिला आणि दुसऱ्या पोलीस कर्मचाऱ्याला धक्काबुक्की करत त्याच्या गणवेशाची नेमप्लेट तोडली.
या घटनेनंतर पोलिसांनी मदतीसाठी इतर पोलिसांना बोलावले; मात्र तोपर्यंत तिघेही पळून गेले होते. पोलिसांनी त्यांच्या मोबाईलमध्ये या घटनेचे चित्रीकरण केले होते आणि घटनास्थळी एका तरुणाचा मोबाईल सापडला. त्याचा वापर करून उरण पोलिसांनी तिन्ही आरोपींचा शोध घेतला.