माजी आमदार बच्चू कडू दोषी

बच्चू कडू यांना तीन महिने कारावास
सरकारी कर्मचाऱ्यांवरील हल्ल्याप्रकरणी शिक्षा
सकाळ वृत्तसेवा
मुंबई, ता. १२ ः सरकारी कर्मचाऱ्यावर हल्ला केल्याप्रकरणी विशेष सत्र न्यायालयाने माजी आमदार आणि प्रहार जनशक्ती पक्षाचे संस्थापक बच्चू कडू यांना मंगळवारी (ता. १२) दोषी ठरवले. या प्रकरणात त्यांना तीन महिन्यांच्या कारावासाची शिक्षा सुनावली. कडू आमदार होते म्हणजे त्यांना मारहाण करण्याचा परवाना मिळाला असे नाही, अशी टिप्पणीही न्यायालयाने केली.
कडू यांनी २६ सप्टेंबर २०१८ रोजी माहिती आणि तंत्रज्ञान विभागाचे तत्कालीन संचालक प्रदीप पी. यांच्या कार्यालयाला भेट दिली होती. त्यानंतर शाब्दिक वादानंतर कडू यांनी मारहाण केल्याचा त्यांच्यावर आरोप होता. न्यायालयाने कडू यांना सरकारी कर्मचाऱ्यांवर हल्ला करणे किंवा त्यांचे कर्तव्य बजावण्यापासून रोखण्यासाठी त्यांच्यावर गुन्हेगारी बळाचा वापर करणे आणि धमकावणे या आरोपांत दोषी ठरवले. हेतूत: अपमान करण्याच्या आरोपातून मात्र त्याची निर्दोष सुटका केली. एखाद्या विशिष्ट विभागाच्या कारभाराबद्दल किंवा सरकारच्या भरती प्रक्रियेदरम्यान परीक्षा घेण्याबद्दल तक्रारी असू शकतात; परंतु लोकप्रतिनिधी अधिकाऱ्यावर हिंसक हल्ला करेल, अधिकाऱ्याला धमकावेल असा अर्थ होत नाही, असे निरीक्षणही न्यायालयाने कडू यांना दोषी ठरवताना नोंदवले.
---
जामीनही मंजूर
अतिरिक्त सत्र न्यायाधीश सत्यनारायण नावंदर यांनी कडू यांना दोषी ठरवताना त्यांना १० हजार रुपयांचा दंडही ठोठावला. तथापि, कडू यांच्याकडून या निर्णयाला उच्च न्यायालयात आव्हान दिले जाईपर्यंत विशेष न्यायालयाने त्यांच्या शिक्षेला स्थगिती दिली. तसेच त्यांना जामीनही मंजूर केला.