दीड करोडच्या सोन्याच्या चोरी प्रकरणाचा १२ तासात उलगडा

सख्ख्या बहिणीच्या घरातच चोरी
दीड कोटीच्या सोने चोरी प्रकरणाचा १२ तासांत उलगडा
नालासोपारा, ता. १२ ( बातमीदार) : ट्रेडिंगमध्ये झालेल्या नुकसानीमुळे आपल्या सख्ख्या बहिणीच्या घरातच चोरी करणाऱ्या एका तरुणीला पोलिसांनी अटक केली आहे. आरोपी तरुणीने वेशांतर करून बहिणीच्या सासऱ्याला बाथरूममध्ये कोंडून घरातून दीड कोटी रुपयांचे सोन्याचे दागिने लंपास केले. पोलिसांनी अवघ्या १२ तासांत या प्रकरणाचा तपास करीत तिला गुजरातमधून अटक केली. तिच्याकडून चोरीला गेलेला सर्व माल जप्त करण्यात आला आहे.
ही घटना वसई पश्चिमेकडील शास्त्रीनगरमध्ये घडली. उदय भानुशाली यांच्या घरात ही चोरी झाली. आरोपी ज्योती मोहन भानुशाली (वय २७) हिने स्टॉक मार्केटमध्ये वडिलांचे पैसे गुंतवले होते आणि त्यात तिला मोठे नुकसान झाले. वडिलांचे पैसे परत करण्यासाठी तिने आपल्या मोठ्या बहिणीच्या घरावर डल्ला मारण्याचा कट रचला.
रक्षाबंधनानिमित्त घरातील सर्व महिला बाहेर गेल्याची संधी साधून ज्योतीने दाढी लावून, तोंडाला मास्क लावून आणि कच्छी भाषेत बोलून बहिणीच्या सासऱ्याचा विश्वास जिंकला. घरात प्रवेश केल्यावर तिने त्यांना बाथरूममध्ये कोंडले आणि घरातील १.५० कोटी रुपयांचे दागिने घेऊन पळ काढला.
या घटनेनंतर माणिकपूर पोलिसांनी तातडीने तपास सुरू केला. सीसीटीव्ही फुटेज आणि इतर पुराव्यांच्या आधारे पोलिसांनी ज्योतीला गुजरातच्या नवसारी येथून अटक केली. तिच्या डोळ्यातील साम्य पाहून पोलिसांनी तिची ओळख पटवली. पोलिसांनी तिच्याकडून १,४८३.५६० ग्रॅम सोन्याचे दागिने आणि २,३२० ग्रॅम चांदीचे दागिने असा एक कोटी ५० लाख ८४ हजार ५० रुपयांचा मुद्देमाल जप्त केला आहे. या घटनेने नात्याला काळिमा फासल्याचे समोर आले आहे.