अंबरनाथमध्ये रानभाजी महोत्सव उत्साहात

अंबरनाथ, ता. १३ (वार्ताहर) : पावसाळ्यात उपलब्ध होणाऱ्या रानभाज्यांचे आहारातील व औषधी महत्त्व जनतेपर्यंत पोहोचवणे, स्थानिक शेतकऱ्यांना त्यांचे आर्थिक मूल्य पटवून देणे, तसेच जैवविविधतेचे संवर्धन आणि पारंपरिक ज्ञानाचे जतन करण्यासाठी अंबरनाथमध्ये कृषी विभागातर्फे एकदिवसीय रानभाजी महोत्सव मोठ्या उत्साहात पार पडला.
कृषी तंत्रज्ञान व्यवस्थापन यंत्रणा (आत्मा) मार्फत हा महोत्सव अंबरनाथ पंचायत समिती येथे मंगळवारी (ता. १२) भरवण्यात आला होता. गटविकास अधिकारी पंडित राठोड यांच्या हस्ते महोत्सवाला सुरुवात झाली. या वेळी तालुक्यातील शेतकऱ्यांचे एकूण २७ स्टॉल्स लावण्यात आले होते. यामध्ये अळू, चिचिंडा, नायटू, माठ, काळी मेंढी, फोडशी/टाकळा, गवती चहा आणि विविध वनऔषधींचे प्रदर्शन करण्यात आले. या भाज्या पावसाळ्यात सहज मिळणाऱ्या असून, आरोग्यासाठी अत्यंत फायदेशीर मानल्या जातात.

कार्यक्रमाला तालुका कृषी अधिकारी सिद्धार्थ क्षीरसागर, मंडळ कृषी अधिकारी नामदेव शिंदे, उप कृषी अधिकारी बाळासाहेब माने, सहाय्यक तंत्रज्ञान व्यवस्थापक राहुल म्हसदे, तसेच कृषी विभाग व पंचायत समिती अंबरनाथ येथील अधिकारी, कर्मचारी आणि मोठ्या संख्येने शेतकरी उपस्थित होते. उपक्रमामुळे शेतकऱ्यांमध्ये उत्साहाचे वातावरण निर्माण झाले असून, पारंपरिक रानभाज्यांना आधुनिक बाजारपेठेत स्थान मिळावे, यासाठी आत्मा व कृषी विभाग सातत्याने प्रयत्नशील असल्याचे क्षीरसागर यांनी सांगितले. तसेच, नागरिकांनी रानभाज्यांचा आहारात समावेश करून आरोग्यदायी जीवनशैली स्वीकारावी, असेही त्यांनी आवाहन केले.

आरोग्यदायी रानभाज्या
१. अळू (अळुवडीची पाने)
फायदे : आयर्नचा उत्तम स्रोत, पचनास मदत करणारी
उपयोग: भाजी, वडी, सूप

२. चिचिंडा (सर्पोच्चक)
फायदे : जंतनाशक, थंडावा देणारी
उपयोग : वरणात किंवा सूप स्वरूपात

३. नायटू (कंटकालीका)
फायदे : रक्तशुद्धी, सर्दी-खोकल्यावर गुणकारी
उपयोग : उकडून किंवा वरणात

४. माठ (अमरण्थस)
फायदे : आयर्न व कॅल्शियमचा स्त्रोत
उपयोग : भाजी, पराठा, सूप

५. काळी मेंढी / धनेकी
फायदे : रक्तशुद्धी व त्वचारोगांवर उपयोगी
उपयोग : भाजी, पराठा

६. फोडशी / टाकळा / गवती भाजी
फायदे : पचनक्रियेवर उत्तम परिणाम, ज्वरावर उपयुक्त
उपयोग : वरणात, पातळ भाजी म्हणून

७. गवती चहा व वनऔषधींचे उपयोग
फायदे : प्राकृतिक अँटीबायोटिक, श्वसनविकारांवर उपयोगी ठरते.