विरुद्ध दिशेने आलेल्या बसची ट्रकला धडक

अंबरनाथ, ता. १३ (वार्ताहर) : विरुद्ध दिशेने भरधाव आलेल्या बसने समोरून येणाऱ्या ट्रकला दिलेल्या जोरदार धडक दिल्याची घटना अंबरनाथमध्ये मंगळवारी (ता. १२) सकाळी घडली. या घटनेत कोणतीही जीवितहानी झाली नाही; मात्र बस आणि ट्रकचे मोठे नुकसान झाले. अपघातामुळे रस्त्यावर काही काळ वाहतूक कोंडी निर्माण झाली होती. ही घटना अंबरनाथ पश्चिम येथील फॉरेस्ट नाक्यावरील सिग्नलजवळ, सीएनजी पंपासमोर घडली. एका बेशिस्त बसचालकाने विरुद्ध दिशेने येत ट्रकला जोरदार धडक दिली. ही संपूर्ण घटना सीसीटीव्ही कॅमेऱ्यात कैद झाली आहे. सकाळच्या वेळी, कामावर जाण्याची घाई असतानाच झालेल्या या अपघातामुळे आनंदनगर एमआयडीसीकडे जाणाऱ्या वाहतूकीवरही परिणाम झाला. वाहतूक पोलिसांनी तत्काळ घटनास्थळी धाव घेऊन परिस्थिती नियंत्रणात आणली.