खोपोली खालापूर संघर्ष समितीची महावितरण कार्यालयात धडक

खोपोली खालापूर संघर्ष समितीची महावितरण कार्यालयात धडक
खालापूर, ता. १३ (बातमीदार) ः अनियमित विद्युतपुरवठा व स्मार्ट मीटरबाबत खोपोली खालापूर संघर्ष समितीने डॉ. शेखर जांभळे यांच्या नेतृत्वाखाली महावितरण कार्यकारी अभियंता निवेदन देत कारभार सुधारण्याची मागणी केली आहे.
खोपोली शहरात सातत्याने विद्युतप्रवाह खंडित होत आहे. यामुळे सणासुदीच्या तोंडावर नागरिक, व्यापारीवर्गाचे मोठे नुकसान होत आहे. या अगोदर कायमस्वरूपी उपाययोजना करू, असे महावितरणकडून सांगितले होते, परंतु त्यात सुधारणा झाली नाही. अशातच खोपोलीमध्ये अनेक ठिकाणी कुठल्याही प्रकारची पूर्वसूचना न देता स्मार्ट मीटर लावण्याचे काम सुरू झाले आहे. यामुळेदेखील नागरिक संभ्रमात आहेत. मंगळवारी (ता. १२) खोपोली-खालापूर संघर्ष समितीने याबाबत निवेदन दिले असून, स्मार्ट मीटर बसविताना कोणताही वाद निर्माण झाल्यास याची संपूर्ण जबाबदारी महावितरणची असेल, असा इशारा शेखर जांभळे यांनी दिला आहे.