उल्हासनगरात सात कृत्रिम तलावांची निर्मिती

उल्हासनगर, ता. १३ (बातमीदार) : आगामी गणेशोत्सवाच्या पार्श्वभूमीवर उल्हासनगरातील सात कृत्रिम तलावांची दुरुस्ती, शहरातील रस्त्यांवरील खड्डे भरणे, विसर्जनावेळी पोलिस बंदोबस्ताची रूपरेषा यासंदर्भात महापालिका आयुक्त मनीषा आव्हाळे यांनी पालिका व पोलिस अधिकाऱ्यांसोबत आढावा बैठक घेतली.
बैठकीत शहर अभियंता नीलेश शिरसाठे यांना तातडीने सर्व रस्त्यांवरील खड्डे भरण्याचे आणि विसर्जन तलावांची दुरुस्ती करण्याचे आदेश देण्यात आले. गणेश मंडळांची स्वतंत्र बैठक आयोजित करून त्यांना सरकारी नियमावली आणि उच्च न्यायालयाच्या आदेशांची माहिती देत पर्यावरणपूरक उत्सव साजरा करण्याच्या सूचना देण्याचे निर्देश पर्यावरण विभागाला देण्यात आले. सरकारी निर्णयानुसार सहा फुटांपर्यंतच्या मूर्तींचे विसर्जन कृत्रिम तलावात, तर सहा फुटांपेक्षा मोठ्या मूर्तींचे नैसर्गिक जलस्त्रोतात विसर्जन करण्यास परवानगी असल्याचे बैठकीत स्पष्ट करण्यात आले. विसर्जनावेळी बंदोबस्त तैनात करण्यात यावा, असे आदेश आयुक्तांनी पोलिस अधिकाऱ्यांना दिले आहेत.
बैठकीला अतिरिक्त आयुक्त किशोर गवस, धीरज चव्हाण, उपायुक्त विशाखा मोटघरे, दीपाली चौगले, अनंत जवादवार, शहर अभियंता नीलेश शिरसाठे, जनसंपर्क अधिकारी अजय साबळे, विभागीय अधिकारी गणेश शिंपी, विद्युत विभागाचे अभियंता हनुमंत खरात, चारही पोलिस ठाण्यांचे वरिष्ठ निरीक्षक आणि महापालिकेतील विभागप्रमुख उपस्थित होते.

कृत्रिम तलावांची ठिकाणे
प्रभाग समिती १ (उल्हासनगर पोलिस ठाणे) : आय.डी.आय कंपनीजवळील उल्हास नदीलगत, सेंच्युरी क्लब हाऊसजवळ
प्रभाग समिती २ (मध्यवर्ती पोलीस ठाणे) : हिराघाट बोट क्लब, संजय गांधीनगर रेल्वेस्थानक (पश्चिम)
प्रभाग समिती ३ (विठ्ठलवाडी पोलिस ठाणे) : जिजामाता उद्यानाजवळ नाना-नानी गार्डन मराठा सेक्शन, लाल चक्की चौक
प्रभाग समिती ४ (हिललाईन पोलिस ठाणे) : कैलास कॉलनी चौक